Perezida wa Leta Zunze Ubumwe za Amerika, Donald Trump yatangaje ko ibihugu bibeshya imibare y’abanduye n’abahitanwe n’icyorezo cya Coronavirus, bigatuma Amerika ihora imbere mu kugira umubare w’abanduye kuri iki kibazo ku bwo kuvugisha ukuri. Mu ijambo avuga buri munsi rijyanye n’uko iyi virus yifashe, Trump yavuze ko gahunda irambuye yo gufungura ubuzima busanzwe iri butangazwe kuri uyu wa Kane tariki 16 Mata amaze kuganira n’abategeka Leta zigize Amerika. Abajijwe impamvu muri Amerika ari ho Coronavirus iri kwica abantu benshi, Trump yashinje ibindi bihugu kubeshya imibare y’abahitanwa n’iki cyorezo nk’uko BBC ibitangaza. Perezida Trump ati ” Hari umuntu koko wemera imibare ya bimwe muri ibi bihugu?” Gusubira mu buzima busanzwe Perezida Donald Trump yatangaje ko Amerika yarenze igihe cy’agasongero k’imibare y’abandura Covid-19 ndetse ateganya ko leta zimwe zishobora gusubira mu buzima busanzwe muri uku kwezi. Trump yabwiye abanyamakuru ati ” Imibare irerekana ko twarenze agasongera mu bantu bandura. Turizera ko ibyo bizakomeza.” Amerika yari yihaye itariki ya 1 Gicurasi nk’igihe cyo gusubiza igihugu mu buzima busanzwe, gusa Trump yavuze ko Leta zimwe zishobora kubusubiramo na mbere y’icyo gihe. Abajijwe ko bishobora guteza akaga mu gihe abantu basubiye mu buzima busanzwe vuba, Trump yasubije ati: “No mu gukomeza gufunga harimo urupfu.” Yavuze ibijyanye n’indwara zo mu mutwe, ko nko kwiyahura bishobora kwiyongera cyane mu gihe ubukungu nabwo buri gushonga. Miliyoni z’Abanyamerika zatakaje akazi kubera amategeko yo guhagarika ubuzima busanzwe, imibare y’abadafite akazi iri ku kigero kitigeze kibaho mbere muri Amerika. Abaturage muri leta ya Michigan bigabije imihanda bamagana amategeko yo kubaheza mu ngo zabo. Amerika ifite abantu barenga 638,000 basanzwemo Coronavirus naho abarenga 30,800 yarabishe mu gihe cy’ukwezi n’igice gusa umuntu wa mbere apfuye azize iyi ndwara muri Amerika.
