Imirwano hagati y’abarwanyi ba AFC / M23 na Wazalendo/FARDC biravugwa ko yasubukuwe mu gitondo cyo kuri iki Cyumweru, itariki ya 21 Nzeri, i Katobi, mu gace ka Banakindi, muri Gurupoma ya Kisimba (Teritwari ya Walikale) mu Ntara ya Kivu y’Amajyaruguru.
Amakuru atandukanye ava mu karere k’imirwano avuga ko urusaku rw’intwaro ziremereye n’izoroheje rwumvikanye mu nkengero za Katobi, hafi ya Mpety, mu birometero 18 mu burasirazuba bw’Umujyi wa Pinga.
Ikinyamakuru Actualite.cd kivuga ko inyeshyamba za M23 zasubijwe inyuma kuwa Gatandatu, zagarutse kuri iki Cyumweru zigerageza kwigarurira uwo mudugudu zimaze icyumweru zambuwe.
Bivugwa ko zagabye ibitero bishya ahagana saa cyenda z’urukerera ku isaha yaho ariko ntihavugwa niba zisubije aho hantu. M23 ntacyo yatangaje kuri iyo mirwano.
Iyi mirwano ibaye nyuma y’uko ngo inyeshyamba za M23 zongerewe ingufu z’abantu n’amasasu kuri uyu wa Gatandatu mu gace gakikije Mpety, hamwe n’abasirikare bavuye Kalembe na Kitshanga.
