Ba Jenerali 3 ba FARDC barashinjwa kujya mu mutwe ugambiriye guhirika Tshisekedi ku butegetsi 

Abasirikare batatu bo ku rwego rwa ba Jenerali bo mu ngabo za Repubulika Iharanira Demokarasi ya Congo bamaze amezi arenga abiri batawe muri yombi, barashinjwa kujya mu mutwe ugambiriye guhirika ku butegetsi Perezida Félix Antoine Tshisekedi wa kiriya gihugu.

Muri Kanama uyu mwaka ni bwo aba basirikare barimo Gen. Christian Tshiwewe Songesa wahoze ari Umugaba Mukuru w’Ingabo za FARDC, Lt. Gen. Franck Ntumba wahoze akuriye ibikorwa bya gisirikare mu biro bya Perezida Tshisekedi na Général de Brigade Benjamin Katende Batubadila batawe muri yombi.

Icyo gihe kandi hanatawe muri yombi Général-Major Christian Ndaywel wahoze ari umuyobozi w’urwego rushinzwe ubutasi bwa gisirikare ndetse n’Umugaba w’Ingabo zirwanira ku butaka.

Inyandiko urwego rushinzwe ubutasi bwa gisirikare muri RDC rwasohoye ku wa 6 Ukwakira, ishinja bariya basirikare batatu ba mbere “kujya mu mutwe ugambiriye guhirika ku butegetsi Perezida Félix Antoine Tshisekedi Tshilombo”.

Ibi byatumye ubuyobozi bw’umutwe ushinzwe kurinda Perezida Tshisekedi n’abandi bayobozi bakuru mu gihugu bubambura abasirikare bari bashinzwe kubacungira umutekano, bubohereza ku cyicaro gikuru cy’ingabo za Repubulika Iharanira Demokarasi ya Congo.

Igisirikare nticyigeze gisobanura umutwe bariya basirikare babagamo cyangwa bakoranaga na bo, icyakora amakuru avuga ko bafunzwe bakekwaho kuba barakoranaga bya hafi na Joseph Kabila Kabange wahoze ari Perezida wa RDC, mu mugambi wo guhirika Tshisekedi ku butegetsi.