Tshisekedi yashyizeho umusimbura wa Gen. Mwaku wapfiriye muri Uvira

Perezida Félix Antoine Tshisekedi wa Repubulika Iharanira Demokarasi ya Congo, yashyizeho umuyobozi w’akarere ka 33 ka gisirikare k’ingabo za Repubulika Iharanira Demokarasi ya Congo ndetse n’uw’ibikorwa bya gisirikare bigamije kurandura imitwe yitwaje intwaro mu ntara ya Kivu y’Amajyepfo bizwi nka Opérations Sokola 2.

Général de Brigade Ilunga Kabamba Jean-Jacques ni we wahawe kuyobora akarere ka 33 ka gisirikare k’ingabo za Congo Kinshasa.

Ni inshingano yasimbuyeho Général de Brigade Mwaku Mbuluku Jean Daniel wapfiriye mu mujyi wa Uvira muri Nzeri azize urupfu rutunguranye.

Général de Brigade Amuli Civiri ku rundi ruhande yagizwe umuyobozi wa Operation Sokola 2, asimbuye kuri izo nshingano Général de Brigade Mwehu Evariste.

Umuvugizi w’Ingabo za RDC muri Kivu y’Amajyepfo, Sous-Lieutenant Mbuyi Reagan Kalonji, yatangaje ko kuri uyu wa Gatatu tariki ya 22 Ukwakira ari bwo bariya ba Jenerali bombi bageze mu mujyi wa Uvira.

Ubwo bageraga ku mupaka wa Kavimvira uhuza Repubulika Iharanira Demokarasi ya Congo, bahakiririwe n’Umuyobozi wungirije w’ibikorwa bya Operations Soloka 2, Col. Apolo Bangala.

Bageze muri Uvira kandi mu gihe amakuru avuga ko isaha n’isaha uyu mujyi wa kabiri munini muri Kivu y’Amajyepfo ushobora kugabwaho ibitero n’inyeshyamba zo mu mutwe wa M23 zimaze igihe zifite gahunda yo kuwigarurira.