Imbwa yo muri Leta ya Carolina y’Amajyaruguru iri mu zigize Leta zunze ubumwe z’Amerika, yasanzwemo Covid-19 iba iya mbere imenyekanye muri iki gihugu yanduye iki cyorezo.
Iyi mbwa yitwa Winston, yagaragaye muri Kaminuza ya Duke ahari umuryango wa McLean wo mu gace ka Chapel Hill abenshi mu bawugize bose banduye Covid-19, ukaba uri gukorwaho ubushakashatsi.
Abagize uwo muryango banduye Coronavirus barimo umugore, umuhungu wabo ndetse n’iriya mbwa, mu gihe umukobwa wabo, indi mbwa ndetse n’injangwe basanze nta Covid-19 banduye.
Dr. Chris Woods ukuriye iperereza muri Kaminuza y’ubushakashatsi muri Duke, yavuze ko Winston ishobora kuba ari yo mbwa ya mbere muri Amerika bimenyekanye ko yanduye Covid-19.
Heather McLean, umugore wo mu muryango wa McLean akaba n’umwarimu ushinzwe ubuvuzi bw’amatungo mu ishuri ry’ubuvuzi rya kaminuza ya Duke, yabwiye igitangazamakuru WRAL ko Winston yari yagaragaje ibimenyetso byoroheje birimo kwigunga, gukorora no kwanga ku rya mbere yo gusangwamo Covid-19.
Umuhungu we witwa Ben McLean we yavuze ko iriya mbwa yanduye bitewe n’uko ikunze kurigata amasahani baririyeho ndetse ikaba inakunze kuryama mu buriri bwa nyina.
Winston yabaye imbwa ya mbere igaragayeho Covid-19 muri Amerika, gusa si yo ya mbere igaragayeho iki cyorezo ku Isi kuko muri Werurwe uyu mwaka hari indi yo muri Hong Kong yishwe na cyo, nyuma y’imyaka 17 ivutse.
Imbwa yonyine si yo nyamaswa byagaragaye ko ishobora kwandura Coronavirus, kuko hari n’injangwe iherutse kugaragaraho mu bihugu bya Esipanye na Leta zunze ubumwe z’Amerika.
