Leta ya Tanzania yashinje Kenya baturanye guhimba imibare y’abashoferi bayo batwara amakamyo bagaragayeho icyorezo cya Covid-19 ku mupaka wa Namanga ugabanya ibihugu byombi, ibyo Tanzania ivuga ko ari ibinyoma bigamije gusiga isura mbi ubukerarugendo bwayo.
Ni ibyemejwe n’umuyobozi w’akarere ka Arusha, Mrisho Gambo, mu itangazo yasohoye avuga ko abashoferi Kenya yemeje ko banduye Covid-19 Tanzania yabapimye igasanga ari bazima.
Iryo tangazo riragira riti ” Mu rwego rwo kwemeza ukuri kw’ibisubizo bya COVID-19 , twafashe abashoferi b’amakamyo 19 bo muri Tanzania bari barapimwe na Kenya ikemeza ko bagaragaye ku mupaka wa Namanga baranduye. Ibisubizo bimaze gushyikirizwa Laboratwari nkuru y’igihugu i Dar es Salaam, byagarutse byerekana ko ba bashoferi bose ari bazima.”
Yongeyeho ati: “Turahamya ko iyi ari imyigaragambyo nkana yateguwe na Kenya igamije kurwanya muri Arusha na Tanzaniya muri rusange.”
Tanzania ivuga ko kuba itarizeye ibisubizo byatanzwe na Kenya, byatumye ifata icyemezo cyo gusubiramo ibipimo byose byari byafashwe.
Amakuru avuga ko gutangira gukusanya ibisubizo byari byatanzwe na Kenya byatangiye ku wa 14 Gicurasi, hafatwa ibipimo by’abashoferi 44, ibisubizo byashyirwa ahagaragara ku wa 16 Gicurasi bikerekana ko abashoferi 14 ari bo bonyine banduye Covid-19.
Muri abo 14 bagaragayeho Covid-19, 11 bari abo muri Kenya, umwe ari Umugande, mu gihe abandi babiri ari abo mu bihugu bitatangajwe.
Ku wa 16 Gicurasi abandi bashoferi 23 bari baremejwe na Kenya ko banduye bongeye gupimwa na Tanzania, ibisubizo bigaragaza ko 10 bonyine ari bo banduye abandi 13 ari bazima.
Kwitana ba mwana hagati ya Kenya na Tanzania kubera icyorezo cya Covid-19, byatumye mu minsi ishize perezida Uhuru Kenyatta afata icyemezo cyo gufunga imipaka ihuza igihugu cye na Tanzania.
Tanzania ishinjwa kudashyiraho ingamba zo gukumira ikwirakwira ry’icyo cyorezo, bijyanye n’uko itagitanga amakuru mashya acyerekeyeho.
Iki gihugu kandi gishinjwa kudafatanya n’ibindi mu gukumira Covid-19, nyuma yo kutagaragara mu nama ebyiri z’umuryango wa Afurika y’Iburasirazuba zigaga kuri Coronavirus.
