Wilson Roosevelt Jerman, umusaza w’imyaka 91 wakoreye mu biro bya Perezida wa Leta Zunze Ubumwe z’Amerika imyaka 55 yishwe n’indwara y’icyorezo ya Covid-19.
CNN yatangaje ko uyu musaza yatangiye gukora muri ibi biro mu 1957 ubwo yakoraga akazi ko gusukura no gukingura imiryango. Icyo gihe hari ku butegetsi bwa Dwight Eisenhower.
Ku butegetsi bwa John Kennedy, Jerman yashimiwe n’umugore w’uyu Mukuru w’Igihugu, Jacqueline Kennedy bitewe n’uburyo yakoragamo akazi, maze azamurwa mu ntera yo kujya agaburira abo muri ibyo biro.
Umuryango wa George W. Bush nyuma yo kumva inkuru y’urupfu rwa Jerman, nawo washimiye imikorere y’uyu musaza yarangwaga n’umwete. Bush n’umugore we, Laura babwiye NBC bati: ” [Jerman] ni we wa mbere twabonaga mu gitondo, akaba ari na we wa nyuma twahasangaga tugarutse.” Hano basobanuraga uburyo yazindukaga, akava ku kazi akerewe.
Mu 2012, ku butegetsi bwa Barack Obama ni bwo Jerman yasezeye kuri uyu murimo bitewe n’izabukuru. Uyu musaza yakoze aka kazi ku butegetsi bw’Abaperezida n’iki gihugu 11.
Jerman yakoze muri ibi biro ku butegetsi bw’abakurikira:
- Dwight Eisenhower (1953-1961)
- John Kennedy (1961-1963)
- Lyndon Johnson (1963-1969)
- Richard Nixon (1969-1974)
- Gerald Ford (1974-1977)
- Jimmy Carter (1977-1981)
- Ronald Reagan (1981-1989)
- George H. W. Bush (1989-1993)
- Bill Clinton (1993-2001)
- George W. Bush (2001-2009)
- Barack Obama (2009-2017)
