Komisiyo yigenga ishinzwe amatora mu Burundi (CENI) yagaragaje ko ibyavuye mu matora by’agateganyo muri za Komine zitandukanye mu gihugu bigaragaza ko Gen. Evariste Ndayishimiye uhagarariye ishyaka rya CNDD-FDD ari ku mwanya w’imbere, mu gihe Agathon Rwasa uhagarariye CNL, na we avuga ko bigaragara ko yatsinze aya matora mu buryo bw’agateganyo.
Tariki ya 21 Gicurasi 2020 ni bwo Radio na Televiziyo by’u Burundi (RTNB) yashyize hanze amajwi y’agateganyo ikesha CENI. RTNB iti: “Iby’agateganyo byavuye mu matora muri komine…: ishyaka CNDD-FDD riza ku mwanya wa mbere, rikurikiwe na CNL.”
Intara zari zamaze gushyira hanze ibyavuye mu ibarura ry’amajwi zirimo Bururi, Karusi (komine 6), Bujumbura (komine 2), Gitega (komine 7), Mwaro (komine 6). Aya makuru aturuka muri komisiyo zishinzwe amatora ku rwego rwa Komine.
Ku rundi ruhande, Rwasa yagiranye ikiganiro na SOS Media, yemeza ko ishyaka rye riri ku mwanya wa mbere mu majwi, ashingiye ku byo yabonye nyuma yo gukurikirana ibyavuye mu matora mu Ntara zitandukanye.
Yagize ati: “Kuva ejo (tariki ya 20) twatangiye kubara hirya no hino. Icyo twabonye ni uko CNL iza ku mwanya wa mbere.” Yongereyeho ko uretse no mu matora y’Umukuru w’Igihugu, CNL iza ku mwanya wa mbere no mu matora y’abagize inteko ishinga amategeko ndetse n’abazahagararira za komine.
Asaba CENI gukora inshingano zayo neza, idakoreshejwe n’abandi muri iki gihe cyo kubarura amajwi no gutangaza ibyavuye mu matora.
Igitangazamakuru Itara cyo cyatangaje ko ibitangazamakuru bikorera imbere mu Burundi byategetswe gutangaza ko CNDD-FDD iza ku mwanya wa mbere mu majwi, igakurikirwa na CNL.
Amatora y’ubushize
Mu 2010, ku nshuro ya mbere Pierre Nkurunziza yatorewe n’abaturage kuyobora igihugu, yari umukandida rukumbi ahagarariye CNDD-FDD nyuma y’aho abandi barimo Agathon Rwasa bari bamaze gukuramo kandidatire (Candidature).
Rwasa byavugwaga ko yahungiye muri Repubulika ya Demukarasi ya Congo, yavuze ko kwivana mu ihatana byatewe n’iterabwoba ryashyizwe ku bakandida. Icyo gihe ntabwo yemeye ibyavuye mu matora. Mu matora ya 2015, Pierre Nkurunziza wa CNDD-FDD yahatanye na Agathon Rwasa. Nkurunziza yagize amajwi 69.41%, Rwasa agira 18.99%.
Harabura iminsi itatu cyangwa ine kugira ngo ibyavuye mu matora mu buryo budakuka bijye ahagaragara nk’uko CENI yabitangaje amatora arangiye. Icyo gihe ni bwo hazamenyekana Umukuru w’Igihugu mushya nyuma y’imyaka 15 u Burundi buyobowe na Pierre Nkurunziza, uba ufite umwanya w’Umuyobozi w’Ikirenga.
