Mu ijoro ryakeye Minisiteri y’Ubuzima mu Rwanda (Minisante), yatangaje ko mu gihugu habonetse umuntu wa mbere wahitanwe n’icyorezo cya Covid-19, bituma u Rwanda ruva mu mubare w’ibihugu bya Afurika bitaragaragaramo uwishwe n’iki cyorezo.
Minisante yavuze ko uwishwe na Covid-19 ari umushoferi w’imyaka 65 wari utuye mu gihugu cy’abaturanyi kitavuzwe izina, wahisemo gutaha mu Rwanda nyuma yo kuremba.
Yakomeje igira iti “Yitaweho n’abaganga mu kigo cyagenewe kuvura Coronavirus. Ariko yaje gupfa azize kwangirika imyanya y’ubuhumekero.”
Uyu muntu utatangajwe imyirondoro yabaye umuntu wa mbere mu Rwanda, witabye Imana azize Coronavirus kuva iki cyorezo cyagera mu gihugu ku wa 14 Werurwe 2020.
Magingo aya ibihugu bitanu bya Afurika bitaragaragaramo umuntu wishwe n’icyorezo cya Virusi ya Corona birimo Uganda ibarurwamo abantu 446 banduye iki cyorezo, Eritrea ibarurwamo 39 bose bakize, Namibia ibarurwamo 23, Seychelles ibarurwamo 11 na Lesotho ibarurwamo babiri.
Kugeza ubu ibihugu byoretswe n’iki cyorezo birimo Misiri ibarurwamo abapfu ba Coronavirus 879 n’abanduye 22,087, Algeria ibarurwamo abantu 646 bishwe na yo n’ababarirwa muri 9,267 bayanduye na Afurika y’Epfo ibarurwamo abapfu ba Coronavirus 643 n’abayanduye 30,967.
Ku mugabane wa Afurika harabarurwa abapfu ba Covid-19 babarirwa muri 3,995 n’abayanduye barenga 139,000. Abamaze gukira barenga 58,000.
