Amerika: Abigaragambya barenga 4000 bamaze gutabwa muri yombi

Ibihumbi by’Amanyamerika bamaze gutabwa muri yombi na Polisi ya Leta zunze ubumwe za Amerika, bazira gushaka gukora urugomo mu gihe cy’imyigarambyo yo kwamagana urupfu rwa George Floyd, umwirabura wishwe n’abapolisi ba Amerika ku wa mbere w’icyumweru gishize.

Kuva ku wa kabiri w’icyumweru gishize Abanyamerika bigabije imihanda yo mijyi itandukanye, bamagana urupfu rwa Floyd n’urugomo urwo ari rwo rwose rukorerwa abirabura.

Iyo myigaragambyo yo ku rwego rwo hejuru yatumye Leta ya Amerika ihitamo gusuka abasirikare n’abapolisi mu mijyi itandukanye, kugira ngo bahangane n’abagerageza kurenga imbibi zigenga imyigaragambyo bagakora ibikorwa bitemewe.

Imyigaragambyo ikomeye nk’iri kubera muri Amerika yaherukaga kubera muri iki gihugu hagati y’umwaka wa 1964 n’uwa 1973, ubwo abaturage bamagana uruhare rwa Amerika rwiyongeraga umunsi ku wundi mu ntambara ya Vietnam.

Nko muri Philadelphia imyigaragambyo yaranzwe no gutera abapolisi amabuye n’amacupa, ndetse amaduka menshi y’ubucuruzi asahurwa n’abantu bari bahishe amasura.

Muri Minneapolis ho abigaragambya batwitse Station ya Polisi, ndetse n’imodoka yayo bayishumikamo umuriro. Abigaragamya kandi bacishamo bagashyira indabo ahantu George Floyd yiciwe muri uriya mujyi.

Imyigarambyo ikomeye yanabereye imbere ya White House, ibiro bya Perezida wa Leta zunze ubumwe za Amerika ahamaze igihe hateraniye abarenga 1000. Imyigaragambyo yo kuri White House yaranzwe no gucana imiriro ku mihanda iyikikije, abigarambya banamanura ibendera rya Amerika ryari hafi aho bararitwika. Inzu zitandukanye na zo zarashumitswe.

Amakuru avuga ko mu myigaragambyo y’imbere wa White House hiyambajwe abasirikare 1700 bo mu mutwe urinda umukuru w’ibihugu ngo bakumire abigaragambyaga gusa bikaba iby’ubusa.

Mu mijyi imwe n’imwe nka New York, Washington D.C., Minneapolis, Atlanta na Seattle abigaragambya bakozanyijeho na Polisi.

Ku munsi w’ejo ku cyumweru hari hamaze gutabwa muri yombi ababarirwa muri 4100, kandi imyigaragambyo yari igikomeje.

Abigaragambya bavuga ko nyuma y’igihe kirekire abirabura bicwa bazira ubusa, igihe kigeze ngo na bo bahabwe agaciri nk’abantu. Ibi ni na byo kandi abatuye hirya no hino ku Isi barimo abanyamuziki, abakinnyi b’imikino itandukanye n’abanyapolitiki bakomeje kuvuga, basaba ko ubuzima bw’umwirabura bwahabwa agaciro.

Ku bwa Barack Obama wabaye Perezida wa Leta zunze ubumwe za Amerika, ntibikwiye ko “Muri Amerika ya 2020” umuntu yica undi nk’uko George Floyd yishwe na Derek Chauvin.

Ibi ni na byo ibyamamare birimo Rihanna, Jay-z, Taylor Swift, LeBron James, Stephen Curry, Jadon Sancho n’abandi bagiye bagarukaho basaba ko ubuzima bw’umwirabura bwahabwa agaciro.