Général Major Évariste Ndayishimiye uheruka gutorerwa kuyobora u Burundi, yatangaje ko atatangajwe na Agathon Rwasa uvuga ko atemera ko yamutsinze mu matora y’Umukuru w’Igihugu, ngo kuko “nta muryango ubura ikigoryi”.
Komisiyo y’Igihugu y’Amatora mu Burundi (CENI), ku wa 25 Gicurasi yatangaje Gen Ndayishimiye Evariste yatorewe kuyobora u Burundi, nyuma yo gutsinda amatora yabaye ku wa 20 Gicurasi.
Ibyavuye mu matora y’Umukuru w’Igihugu mu Burundi byamaganiwe kure na Agathon Rwasa wo mu ishyaka CNL ritavuga rumwe n’ubutegetsi, avuga ayo matora yabayemo uburiganya ndetse akaba yaranaranzwe n’ibikorwa byo guhohotera abarwanashyaka be.
Mu kiganiro Général Ndayishimiye yagiranye na Televiziyo y’igihugu y’u Burundi RTNB, yanenze mukeba we Agathon Rwasa avuga ko ibyo yavuze bidakwiye.
Ndayishimiye yavuze ko abarwanya ishyaka CNDD-FDD yari ahagarariye mu matora atari bo bonyine bakwiye kuvuga ko amatora yaranzwe n’uburiganya, ngo kuko ari ibyakavuzwe n’Abarundi bose.
Yagize ati”Ese si ishyaka rimwe gusa ritemera ibyavuye mu matora? Ni ryo ryonyine ryitotomba! Hari irindi shyaka mwumvise muri icyo kibazo? Ese ishyaka rimwe rishobora gutsinda Abarundi bose bishyize hamwe? Imana yamaze kuduhuza, uzabona ko nta wundi Muntu uzigaragambya.”
Yakomeje agira ati”Nk’uko babivuze, nta muryango ubura ikigoryi. Hagomba kubaho itsinda rigerageza kudusenya. Agatsiko nkako buri gihe kagomba kubaho. Ni byo nkunda kuko sogokuru Perezida Nkurunziza, yarambwiye ati barakenewe kuko nibo batuma turushaho kugira ubwenge”.
Amajwi y’agateganyo y’ibyavuye mu matora y’Umukuru w’Igihugu mu Burundi yerekana ko Général Ndayishimiye yatsinze amadorali ku majei 68.72%; agakurikirwa na Agathon Rwasa wa CNL wagize 24.19%.
Rwasa yanenze uko amatora yagenze mu gihe imiryango Mpuzamahanga n’ibihugu bitandukanye byemeje ko amatora y’i Burundi yanyuze mu mucyo.
