Urukiko rurengera iremezo ry’itegeko nshinga mu Burundi, rwemeje Général Major Ndayishimiye Evariste nka Perezida mushya w’iki gihugu, nyuma yo gutsinda amatora y’umukuru w’igihugu yabaye ku wa 20 Gicurasi.
Uru rukiko kandi rwanemeje ko ishyaka CNDD-FDD rya Perezida Evariste Ndayishimiye ari ryo ryatsinze amatora y’abagize inteko ishinga amategeko, ndetse n’ay’abayobozi b’amakomini agize u Burundi.
Ibyavuye mu matora byatangajwe by’agateganyo ku wa 25 Gicurasi, byerekanye ko Ndayishimiye yatsinze amatora ku majwi 68%, ahigitse Agathon Rwasa w’ishyaka CNL wagize amajwi 24.17%.
Rwasa yari yatangaje ko ayo matora yabayemo uburiganya anatanga ikirego muri ruriya rukiko, gusa rwanzuye ko ikirego cye giteshejwe agaciro kandi icyo cyemezo kigahita gitangira gushyirwa mu bikorwa.
Ntiharamenyekana icyo Agathon Rwasa akurikizaho nyuma y’uko urukiko ruteye utwatsi ikirego cye, gusa mu minsi ishize yari yatangaje ko Urukiko rushinzwe kurengera iremezo ry’itegeko nshinga nirutamwumva aziyambaza urukiko rw’umuryango wa Afurika y’Iburasirazuba.
Ibyavuye mu matora bya byerekana ko Général Evariste Ndayishimiye yayatsinze ku ijanisha rya 68, agakurikirwa na Agathon Rwasa wagize 24.42% mu gihe uwa gatatu ari Gaston Sindimwo w’ishyaka UPRONA watsinze amatora kuri 2.46%.
Mu matora y’abagize inteko ishinga amategeko, CNDD-FDD yatsinze ku kigero cya 68%, CNL iyatsinda ku ijanisha rya 22,24 mu gihe UPRONA yayatsinze ku ijanisha rya 2,43.
Ndayishimiye Evariste agiye gusimbuye Pierre Nkurunziza wari umaze imyaka 15 ayobora u Burundi.
