Umufaransa Anthony Martial, yafashije Manchester United gutsinda Sheffield United ibitego 3-0, aba Umukinnyi wa mbere ubashije gutsindira Manchester United ibitego bitatu mu mukino umwe wa shampiyona y’Abongereza mu myaka irindwi ishize.
Umuholandi Robin Van Persie ni we waherukaga gutsinda Hat-trick muri shampiyona y’Abongereza yambaye umwambaro wa Manchester United.
Ibitego bya Martial byafashije Manchester United gusatira Chelsea ya kane ku rutonde rwa shampiyona kuri ubu ikiyirusha amanota abiri, mbere y’uko iyi kipe y’umutoza Frank Lampard icakirana na Manchester City mu mukino iteganyijwe ku munsi w’ejo ku wa kane.
Ni ibitego kandi byatumye ikipe ya Sheffield y’umutoza Chris Wilder ikomeza kujya ahabi, dore ko mu mikino itatu iheruka gukina yanganyijemo umwe ibiri yindi ikayitsindwa.
Abakurikiranira hafi Manchester United basanga kuba Anthony Martial akomeje kwitwara neza muri iyi kipe, bifite aho bihurira na Bruno Fernandes wageze muri iyi kipe muri Mutarama uyu mwaka avuye muri Sporting Lisbon.
Kuva uyu munya Portugal yagera muri Manchester United, Martial amaze gutsinda ibitego bitandatu mu mikino irindwi bakinanye, ibishimangira runini amufatiye.
Uretse kuba yanditse amateka mashya muri Manchester United, Anthony Martial yanujuje ibitego 19 amaze gutsindira iyi kipe mu marushanwa atandukanye y’uyu mwaka w’imikino.
Martial yatsindiye Manchester United igitego cya mbere ku munota wa karindwi w’umukino, icya kabiri agitsinda ku wa 44 mbere yo gusoza akazi ku munota wa 74. Uyu musore ukunze guhora arakaye, agitsinda igitego cya gatatu yagaragaye amwenyura, bigashimangira buryo ki yari yizihiwe.
Abakinnyi barimo Bruno Fernandes, Nemanja Matic na Paul Pogba bari mu bitwaye neza cyane muri uyu mukino, mu gihe Marcus Rashford na we yigaragaje atanga umupira wavuyemo igitego cya mbere.
