Umuvugizi wa Perezida Macky Sall wa Sénégal, yatangaje ko uyu mukuru w’igihugu yamaze kwishyira mu kato nyuma yo guhura n’umuntu wanduye icyorezo cya Covid-19.
Itangazo ryasohowe n’ibiro bya Perezida Sall rigatambuka kuri Televiziyo y’igihugu, rivuga ko Perezida Sall bamupimye bagasanga nta Covid-19 yanduye, gusa akaba yahisemo kwishyira mu muhezo mu gihe cy’ibyumweru bibiri nk’ingamba yo kwirinda ikwirakwira rya kiriya cyorezo.
Seydou Gueye, umuvugizi wa Perezida Macky Sall ni we wemeje ayo makuru agira ati: “Ku bw’inama z’abaganga kuri kiriya kibazo, Perezida Sall yishyize mu kato k’ibyumweru bibiri uhereye kuri uyu wa gatatu.”
Ntihatangajwe imyirondoro y’uwanduye Covid-19 Perezida Macky Sall yaba yarahuye na we mbere yo kwishyira mu kato.
Mu gitondo cy’ejo ku wa Gatatu, Yeya Diallo, umudepite mu nteko ishinga amategeko ya Senegal yatangaje ko yanduye Covid-19, mbere y’uko ahamagarira rubanda kubahiriza ingamba zijyanye no guhangana na kiriya cyorezo, zirimo kwita ku isuku no gusiga intera hagati y’umuntu n’undi, gusa ntibyatangajwe niba ari we watumye Umukuru w’Igihugu cya Sénégal yishyira mu kato.
Sénégal iri mu bihugu bya Afurika bigaragaramo umubare munini w’abanduye Covid-19, muri iki gihugu cyo mu Burengerazuba bwa Afurika hakaba habarurwa abantu 6,129 banduye kiriya cyorezo barimo 93 cyahitanye.
