Ikipe ya Liverpool yegukanye igikombe cya shampiyona y’Abongereza yaherukaga gutwara mu myaka 30 ishize, nyuma y’uko Chelsea itsinze Manchester City bari bagihanganiye ibitego 2-1.
Ibitego bya Christian Pulisic ku munota wa 34 na Willian ku wa 79 w’umukino byari bihagije kugira ngo Liverpool yegukane igikombe cya shampiyona y’Abongereza, dore ko yasabwaga amanota abiri yonyine kugira ngo igitware nyuma y’uko ku munsi w’ejo yari yanyagiye Crystal Palace ibitego 4-0.
Manchester City yari ihanganiye na Liverpool igikombe cya shampiyona, yari yasuye Chelsea mu mukino w’umunsi wa 31 wa shampiyona y’Abongereza wabereye ku kibuga Stamform Bridge. Ni umukino iyi kipe yasabwaga gutsindwa cyangwa kunganya Liverpool igahita yitwarira igikombe.
Manchester City y’umutoza Pep Guardiola nk’ibisanzwe yihariye umukino cyane, gusa Chelsea y’umutoza Frank Lampard igakina bike bikenewe.
Chelsea yafunguye amazamu ku munota wa 34 w’umukino, ku mupira Benjamin Mendy yarwaniye na Ikary Gundogan bakawutakaza, bikarangira Pulisic awubatwaye mbere yo kuwutereka mu rucundura.
Manchester City yishyuye iki gitego ku munota wa 55 ibifashijwemo na Kevin De Bruyne, kuri Coup-Franc uyu Mubiligi yateye nyuma y’ikosa N’golo KantĂ© yari akoreye kuri Riyad Mahrez inyuma gato y’urubuga rw’amahina.
Ni mbere gato y’uko Willian atsindira Chelsea igitego cya kabiri ku munota wa 78 kuri Penaliti, nyuma y’ikosa Fernandinho weretswe ikarita itukura yari akoreye kuri Pulisic.
Mu gihe shampiyona y’Abongereza ibura imikino irindwi igasozwa, Liverpool yegukanye igikombe cya shampiyona iyiyoboye n’amanota 86, ikaba irusha Manchester City ya kabiri amanota 23.
Bisobanuye ko n’ubwo Manchester City yatsinda imikino yose isigaye Liverpool ikayitsindwa, n’ubundi yasigara iyirusha amanota abiri.
Chelsea nyuma yo gutsinda Manchester City yagumye ku nwanya wa kane n’amanota 54, ikaba irushwa inota rimwe na Leicester City ya gatatu.
