Umudepite akaba n’umuhanzi utavuga rumwe n’ubutegetsi bwa Uganda, Robert Ssentamu Kyagulanyi uzwi cyane nka Bobi Wine, arashinja Leta ya Uganda kuba imaze kwica abaturage bayo babarirwa mu icumi yitwaje gushyira mu bikorwa amabwiriza yo kwirinda Covid-19.
Ni amabwiriza yashyizweho bwa mbere na Leta ya kiriya gihugu muri Werurwe uyu mwaka, ubwo hagaragaraga umuntu wa mbere wanduye icyorezo cya Covid-19.
Ibyo Bobi Wine avuga abishingira ku kuba inzego zishinzwe umutekano muri Uganda ziganjemo urwa LDU (Local Defense Unit) zarakunze gushinjwa gukoresha ingufu z’umurengera mu guharanira ishyirwa mu bikorwa ry’amabwiriza yashyizweho yo gukumira Covid-19 nka gahunda ya Guma mu rugo, bikaviramo bamwe gutakaza ubuzima na ho abenshi bagakomeretswa mu buryo bukomeye.
Depite Robert Kyagulanyi uri mu baziyamamariza kuyobora Uganda mu matora y’umukuru w’igihugu ateganyijwe mu mwaka utaha, yasembuwe n’urupfu rwa Emmanuel Tegu wigaga mu mwaka wa gatatu muri Kaminuza ya Makerere, bivugwa ko aheruka kuraswa n’abakozi b’urwego rwa LDU.
Ku bwa Bobi Wine: “Muri Uganda, Leta imaze kwica abantu benshi yitwaje ingamba zo gukumira Covid-19. Uheruka gupfa nk’uko ababibonye babivuga yari umunyeshuri wo mu mwaka wa gatatu muri Kaminuza ya Makerere, Emmanuel Tegu wishwe na LDU. Twe abantu dushobora kandi tugomba guhagarika ubu bugome bwambaye ubusa.”
Uretse Emmanuel Tegu, Bobi Wine yanasohoye urutonde rw’abandi bantu icyenda avuga ko na bo bazize Leta ya Uganda muri ibi bihe bya Covid-19, yongeraho ko hari n’abandi bazajya ahagaragara.
Abo yatangaje barimo uwitwa Vincent Serungi, warasiwe muri Wakiso ku wa 31 Werurwe na Margaret Nanyunga, umukecuru w’imyaka 80 y’amavuko wishwe na LDU ku wa 01 Mata ahitwa Kyengera.
Undi ni Wilber Kawono, umumotari [Boda Boda] warasiwe na Polisi i Bukada, ku wa 18 Mata cyo kimwe n’umuzunguzayi witwa Evelyn Namulondo warashwe na Polisi ku wa 13 Gicurasi agapfa nyuma y’iminsi ibiri.
Bobi Wine yanavuze Charles Sanga w’imyaka 63 y’amavuko wagabweho igitero na Polisi n’abasirikare, ku itegeko ry’umuyobozi w’akarere. Hari kandi Alfred Mwanga w’imyaka 46 warashwe na LDU ku wa 10 Gicurasi, mu karere ka Kween.
Abandi ni Eric Mutasiga wari umuyobozi w’ikigo cy’ishuri warasiwe i Mukono na Polisi ku wa 13 Gicurasi, Benon Nsimenta wari umuyobozi w’urusengero warasiwe n’abasirikare muri Kasese ku wa 24 Kamena na Francis Ogwang Munu w’imyaka 65 warasiwe na LDU mu karere ka Oyam ku wa gatandatu tariki ya 27.
