Perezida wa FC Barcelona, Josep Maria Bartomeu yanyomoje amakuru avuga ko Lionel Messi ashobora kuva muri iyo kipe mu mwaka utaha wa 2021, ashimangira ko uyu munya-Argentine azasoreza urugendo rwe nk’umukinnyi w’umupira w’amaguru mu kipe ayoboye.
Mu cyumweru gishize, Radiyo yo muri Espagne yitwa ‘Cadena SER’, yatangaje inkuru ivuga ko Messi azava muri FC Barcelona mu mwaka utaha wa 2021, ubwo amasezerano afitanye na yo azaba arangiye, mbere y’uko iyo nkuru isamirwa hejuru n’ibitangazamakuru bitandukanye.
ESPN yavuze ko impamvu Messi yafashe umwanzuro wo gutandukana n’iyi kipe y’i Catalunya, ari uko afitanye ubwumvikane buke na bamwe mu bagize inama yayo y’ubutegetsi, bagiye bamushinja mu itangazamakuru kugira uruhare mu byemezo bimwe na bimwe ikipe yagiye ifata harimo nko kwirukana umutoza Ernesto Valverde.
Ikindi Messi atishimiye ngo ni uko FC Barcelona nta bakinnyi bashoboye igifite, bigakubitana no kuba ubuyobozi bw’ikipe bwarashyize igitutu ku bakinnyi bubahatira kugabanya imishahara yabo mu gihe cya Covid-19.
Perezida Bartomeu aganira n’itangazamakuru nyuma y’umukino wa Shampiyona ya Espagne FC Barcelona yaraye inyagiyemo Villarreal ibitego 4-1, yavuze ko ibivugwa ko Messi nta masezerano azongera atari ukuri.
Ni umukino gutsinda byatumye FC Barcelona isigara irushwa na Real Madrid amanota ane, nyuma y’uko iyi kipe yari yatsinze Athletic Bilbao igitego 1-0. Ni igitego cyatsinzwe na Sergio Ramos kuri Penaliti yatanzwe nyuma yo kwiyambaza VAR.
Bartomeu yagize Ati: “Turi mu biganiro n’abakinnyi benshi, ariko Messi yadusobanuriye ko yifuza kuguma hano. Bisobanuye ko tugiye kuryoherwa na we ikindi gihe kirekire.”
Perezida Bartomeu yakomoje no kuri VAR muri iyi minsi ishinjwa kubogamira ku ruhande rwa Real Madrid, ashimangira ko VAR itari gukora neza uko bikwiye.
Yagize ati: “Narebye umukino wabereye i Bilbao kandi n’ubwo ntakunda kubivugaho, VAR ntabwo iri gukoreshwa nk’uko bikwiye. Kuva shampiyona yagaruka nyuma y’ibibazo bya Covid-19 ntabwo [Ibintu] byigeze biba uko byari bisanzwe, ibyo byagaragariye mu byavuye mu mikino bisa nkaho buri gihe bitonesha ikipe imwe.”
Mu kumusubiza, Zinedine Zidane utoza Real Madrid we yatangaje ko arambiwe buri gihe kuba insinzi z’ikipe ye muri gihe zijorwa.
