Amadou Gon Coulibaly wari Minisitiri w’Intebe wa Côte d’Ivoire akaba n’uwagombaga guhagararira ishyaka riri ku butegetsi mu matora y’Umukuru w’Igihugu ateganyijwe mu Kwakira uyu mwaka, yitabye Imana kuri uyu wa gatatu.
Ni amakuru yatangajwe na Perezida, Alassane Ouattara, wemeje ko igihugu cyahise kijya mu cyunamo.
Amadou Gon Coulibaly w’imyaka 61 y’amavuko, yaherukaga kumererwa nabi mu nama y’Abaminisitiri yabaye mu ntangiriro z’iki cyumweru, mbere yo kujyanwa mu bitaro ari na ho yaguye.
Itangazo ryasohowe na Perezida Alassane Ouattara ryasomwe n’Umunyamabanga Mukuru we riragira riti: “Basangirangendo, Côte d’Ivoire iri mu marira. Ndabamenyesha ko Minisitiri w’Intebe Amadou Gon Coulibaly yadusize.”
Nyakwigendera Coulibaly yaherukaga gutorwa nk’umukandida ugomba guhagararira ishyaka RHDP riri ku butegetsi muri Werurwe 2020, akaba yanahabwaga amahirwe yo kuba Perezida wa Côte d’Ivoire bijyanye n’uko Perezida Allasane Ouattara yatangaje ko ataziyamamaza mu matora y’Umukuru w’Igihugu.
Coulibaly yitabye Imana, nyuma y’igihe gito agarutse mu gihugu yagezemo ku wa 2 Nyakanga avuye mu Bufaransa aho yari amaze amezi abiri yagiye kwivuza umutima yabazwe muri 2012.
Amakuru avuga ko urupfu rwa Minisitiri Coulibaly rwateje ibibazo mu ishyaka RHDP, bijyanye n’uko nta musimbura we ishyaka ryapfa kubona, mu gihe Perezida Ouatara muri Werurwe yatangaje ko ataziyamamaza.
