Mu kiganiro n’abanyamakuru yakoresheje kuri uyu wa Gatandatu ushize, i Kinshasa, umunyapolitiki utavuga rumwe n’ubutegetsi, Delly Sessanga yagaragaje ishusho ihangayikishije ku bijyanye n’igisirikare n’umutekano mu gihe cy’imyaka itandatu Félix Tshisekedi ari ku butegetsi (2019-2025), nubwo hari amafaranga menshi yashowemo.
Aganira n’abanyamakuru, uwahoze ari umudepite watorewe i Lwiza muri Kasai yagaragaje ubwiyongere bukabije bw’ingengo y’imari mu nzego z’umutekano na gisirikare ku buyobozi bwa Perezida Tshisekedi, aho ingengo y’imari y’igihugu irenga 30% yagenewe izi nzego.
Yagaragaje ko hagati ya 2019 na 2025, ayo mafaranga yageze kuri miliyari 13.65 z’amadolari ya Amerika (GDP y’u Burundi ukubye hafi 2) ariko ntihagire impinduka na nkeya zigaragara ku rugamba. Ati: “nta kwiyongera ingufu kugaragara kw’igisirikare. Nta mutekano urambye uhari ku baturage.”
Yakomeje agira ati: “Ikibazo kimwe rero kibazwa ni: umutungo wose washowe mu kurinda igihugu, umutekano, n’intambara, wagiye he? Ninde wungukirwa n’ayo mafaranga y’intambara? Niba atarafashije gukomeza ubushobozi bwacu bw’ibikorwa no kurengera ubusugire bw’igihugu cyacu, iki kibazo gishobora kuba gihishe ubucuruzi bw’intambara! Abaturage bafite uburenganzira bwo kubimenya!”
Uwahoze ari umudepite ku rwego rw’igihugu agera aho agashinja ubutegetsi bwa Kinshasa “kugira uruhare mu ntambara” hagamijwe “gutinza igihe no kwirinda kubazwa ibisobanuro.”
Umuyobozi utavuga rumwe n’ubutegetsi wasabye ko hashyirwa mu bikorwa igishushanyo mbonera cya komisiyo y’amatora (CENI) ku itegurwa ry’amatora ataha, ateganijwe ku itariki ya 23 Ukwakira 2028, yagize ati: “Guverinoma izi ko, dukurikije Itegeko Nshinga n’isaha ya repubulika, asigaranye iminsi 946 gusa ku butegetsi mbere y’uko manda ya kabiri n’iya nyuma ya Félix Tshisekedi irangira.”
Mu gihe abayoboke benshi b’ubutegetsi buriho bifuza ko Perezida Tshisekedi yaguma ku butegetsi kugira ngo ahagarike icyo bise ubushotoranyi bw’u Rwanda, Delly Sessanga yateye utwatsi uru rwitwazo avuga ko rushobora kuzatinza amatora yo mu 2028. Yamaganye kandi gukoresha intambara nk ‘“urwitwazo rwo gufatira demokarasi.”
Sessanga ati: “Nyuma yo kurwana n’abaturage mu mihanda, isubikwa ry’amatora hagati ya 2016 na 2018, Félix Tshisekedi n’abamushyigikiye ntibashobora, ubu abandi bantu bari inyuma y’isubikwa rishya, bitwaje intambara.”
