Abarwanyi bahoze mu mitwe yitwaje intwaro ikorera mu mashyamba ya Repubulika Iharanira Demokarasi ya Congo by’umwihariko uwa FDLR, bateguriwe umukino wa gicuti igomba kubahuza n’ingimbi z’ikipe ya Musanze FC.
Komisiyo y’Igihugu Ishinzwe Gusezerera no Gusubiza mu Buzima Busanzwe Abahoze ari Abasirikare, yatangaje ko uyu mukino uzabera kuri Stade Ubworoherane y’Akarere ka Musanze, ku Cyumweru tariki ya 29 Werurwe guhera saa munani z’igicamunsi.
Abarwanyi bazawugaragaramo ni abasoje amasomo abategurira gusubira mu buzima busanzwe mu kigo cya Mutobo, icyiciro cya 76.
Gutegura uriya mukino biri mu rwego rwo gufasha bariya bahoze ari abarwanyi mu mitwe yitwaje intwaro itandukanye “gusubira neza mu buzima busanzwe, kubashishikariza gufatanya n’abandi baturarwanda mu bikorwa by’iterambere, no kwimakaza ubumwe n’ubudaheranwa by’Abanyarwanda.”
RDRC yatangaje ko kwinjira kuri uyu mukino bizaba ari ubuntu, isaba Abaturarwanda by’umwihariko abanya-Musanze kuzaza kuwureba ari benshi.
