Ibitanyamakuru byo muri Turkiya biratangaza ngo abantu batatu bapfuye, abapolisi babiri barakomereka mu irasana ryabereye hafi y’inyubako irimo Ambasade ya Israel mu murwa mukuru Istanbul.
Ni kuri uyu wa Kabiri ubwo abantu batatu bitwaje intwaro bageragezaga gutera Ambasade ya Israel ariko bicwa n’abapolisi ba Turkiya.
Amashusho y’Ibiro Ntaramakuru Reuters yerekanye umupolisi akuramo imbunda kandi yikinga amasasu. Undi muntu yagagaye ava amaraso menshi.
Umunyamakuru Sinem Koseoglu wa Al Jazeera yavuze ko agace inyubako ambasade iherereyemo, gatuwe cyane kandi kakaba karimo ubucuruzi bwinshi, harimo n’ubucuruzi mpuzamahanga, hamwe n’abantu “ibihumbi” bakorera hafi aho.
Yongeyeho ko Ambasade ya Israel iri mu igorofa rya karindwi ry’inyubako ndende muri ako gace, ku muhanda wa Buyukdere mu Karere ka Besiktas muri Istanbul.
