Urukiko rw’i Mwaro mu Burundi rwategetse ko umupolisi witwa Osias Irankunda yazafungwa amezi 6,000 (imyaka 500), mu gihe yaba ananiwe kwishyura indishyi z’akababaro za FBU miliyoni 100 rwamuciye.
Uyu mupolisi yakatiwe igifungo cya burundu anacibwa iriya ndishyi, nyuma yo guhamywa kugira uruhare mu rupfu rw’uwitwa Nestor Nininahazwe wari uzwi ku izina rya Gasazi.
Uyu Gasazi wari usanzwe ari umumotari, yishwe mu ijoro rya Pasika ku wa 4 Mata 2026.
Irankunda wari usanzwe acunga umutekano kuri Paruwasi ya Kibungere iri muri Komine Nyabihanga, Zone Kibungere, ni we wamurashe.
Bivugwa ko uyu mupolisi yasanze nyakwigendera ku kabari aho yari ari kunywera akamusaba kumusomya ku icupa ariko undi aramwima, hanyuma bikarangira amurashe.
Nyuma yo kumwica, yahise afatwa ajyanwa gufungirwa kuri sitasiyo ya polisi ya Gitega.
Ibikorwa nk’ibi si bishya muri polisi y’u Burundi.
Muri iki cyumweru, Umuvugizi wa Polisi ya kiriya gihugu yagaragaje abapolisi 6 bashinjwa kwiba umuturage miliyoni 15, nyuma yo kumusanga iwe mu rugo bakamushimuta, mbere yo kumutegeka kubaha miliyoni 20; yaba atazibonye bakazamushyikiriza urwego rw’iperereza, aho ashobora no kuburira ubuzima.
Byarangiye uwo muturage Nyandwi Gerard wari utuye i Kamenge ahamagaye inshuti n’abavandimwe bamufasha kubona miliyoni 15, ari zo yahaye abo bapolisi, baramurekura.
Nyuma amakuru yabo yaramenyekanye barafatwa uko ari batanu, umwe aratoroka.
Pierre Nkurikiye uvugira Polisi y’u Burundi, yavuze ko bariya bapolisi bakoze ibyaha byakozwe ku giti cyabo kuko nta rwego rwabatumye, ashimangira ko bagomba kubihanirwa n’amategeko.
