Umugaba w’Ikirenga w’Ingabo za Uganda, Gen. Yoweri Kaguta Museveni kuri uyu wa 1 Kanama 2020 yakoze impinduka zikomeye mu miyoborere y’igisirikare cy’igihugu.
Yahereye kuri Brig. Gen. Richard Karemire wari umuvugizi w’Ingabo z’igihugu, amugira umunyamabanga Mukuru wa EAC ushinzwe imikoranire mu bya gisirikare (military liaison). Umwanya yariho wahawe Brig. Gen. Flavia Byekwaso.
Brig. Gen. Flavia Byekwaso ni we muvugizi mushya w’ingabo za Uganda, UPDF
Izindi mpinduka:
Mu rwego rwa gisirikare rushinzwe iperereza (CMI), Brig. Gen. Richard Otto yagizwe Umuyobozi wungirije w’uru rwego, asimbuye Brig. Gen. Charles Asiimwe wagizwe umuyobozi w’ikigo gishinzwe kurwanya iterabwoba.
Brig Karemire yoherejwe mu bunyamabanga bukuru bw’Umuryango wa Afurika y’Iburasirazuba (EAC) nk’umuyobozi ushinzwe imikoranire mu bya gisirikare, asimbuye Brigadier General Victor Twesigye uheruka gupfa, waguye iwe mu rugo i Nyarushanje ahitwa Rukungiri, nyuma yo kugwa mu bwihuhagiriro.
Gen. Maj. Hudson Mukasa yagizwe Umugaba Mukuru w’Inkeragutabara asimbuye Gen. Maj. Eric Mukasa uherutse gupfira mu bitaro bya Nakasero muri Kampala.
Gen. Maj. Don Nabaasa yagizwe Umugaba w’Ingabo za Uganda ziri mu butumwa bw’amahoro muri Somalia, AMISOM.
Brig. Gen. Emmanuel Rwashande yagizwe Umuyobozi ushinzwe ubufatanye bw’igisirikare n’abaturage, Brig. Gen. Mathew Gureme umuyobozi ushinzwe imyitozo ya gisirikare.
Col. Keith Katungi yagizwe Umuyobozi w’umutwe w’ingabo ushinzwe imyitwarire y’abasirikare (Military Police). Gen. Maj. Francis Okello yagizwe Umuyobozi w’ishuri rikuru rya gisirikare.
Hari abandi bahawe inshingano zo guhagararira Uganda mu bihugu byabo, mu rwego rwa gisirikare:
Brig. Gen. James Kaija azahagararira Uganda mu Bwongereza, Brig. Gen. Fred Karara muri Sudani, Brig. Gen. Christopher Bbossa mu Bushinwa, Brig. Gen. Mike Kisame muri Kenya, Brig. Gen. Simon Ocan mu Busuwisi, Brig. Gen. James Nambale muri Turukiya na Col. Bahoku Batigye muri Cuba.
