Minisiteri y’Ubuzima muri Uganda, kuri uyu wa mbere yatangaje ko undi muntu muri icyo gihugu yapfuye azize icyorezo cya Covid-19, aba uwa gatanu uhitanwe n’icyo cyorezo mu gihe kitageze ku byumweru bibiri.
Uwapfuye uyu munsi ni “Umugore w’imyaka 46 y’amavuko ufite inkomoko mu gihugu cy’Ubuhinde”, wari utuye mu gace ka Kibuli i Kampala mu murwa mukuru.
Ku wa gatandatu tariki ya 01 Kanama ni bwo uwapfuye yari yagejejwe ku bitaro by’Abayisilamu bya Kibuli, nyuma yo kugaragaza ibimenyetso bya Covid-19 birimo umuriro mwinshi, gukorora ndetse no kugira ibibazo mu nzira z’ubuhumekero.
Uwahitanwe na Covid-19 muri Uganda, yiyongereye ku bandi bagore batatu n’umugabo umwe baheruka kwicwa na kiriya cyorezo, kuva umuntu wa mbere muri Uganda yahitanwa na cyo ku wa 23 z’ukwezi gushize.
Abo barimo umugore w’imyaka 34 y’amavuko wari utuye ahitwa Namisindwa, uw’imyaka (umugore) 80 y’amavuko wari utuye ahitwa Mengo muri Kisenyi, umugabo w’imyaka 67 y’amavuko ukomoka muri Nigeria na we wari utuye muri Kisenyi cyo kimwe n’umugore w’imyaka 61 y’amavuko wari utuye ahitwa Nakukabye.
Kugeza kuri uyu wa mbere tariki ya 03 Kanama, muri Uganda harabarurwa abantu 1,195 banduye Covid-19, mu gihe abamaze gukira icyo cyorezo ari 1,077. Ibyo bishyira Uganda mu bihugu biza imbere mu guhangana na kiriya cyorezo ku Isi birimo n’u Rwanda.
