Rubavu: Mayor yise Kanyamashyamba ‘imbwa, umusazi n’igicucu’ mbere yo kumwirukana

Ndikubwimana Jacques, umukozi w’Akarere ka Rubavu ushinzwe amashyamba n’umutungo kamere, arashinja umuyobozi w’akarere, Habyalimana Gilbert kumwirukana ku mirimo yitwaje impamvu zirimo ‘kubangamira ifungwa ry’ibirombe bitemewe’ , we akemeza ko yirukanwe azira ibibazo bwite bafitanye.

Ku wa 29 Nyakwnga ni bwo uriya mukozi yandikiwe n’umuyobozi w’akarere ka Rubavu, Habyalimana Gilbert, ibaruwa imuhagarika ku mirimo ye by’agateganyo mu gihe kitari munsi y’amezi atandatu, mu gihe hagitegerejwe icyemezo cya Minisiteri y’Abakozi ba Leta n’Umurimo (MIFOTRA).

Muri iyo baruwa BWIZA yashoboye kubonera Kopi, umuyobozi w’akarere ka Rubavu yabwiye Ndikubwimana ko yamuhagaritse kubera impamvu zirimo “Kudafatanya n’ihuriro I.A.K.RU Ltd [Ihuriro ry’amakariyeri ya Rubavu] kurwanya ubucukuzi bukorwa mu kajagari, guhanganisha I.A K.RU Ltd n’abakora ubucukuzi mu kajagari ndetse no gushyamiranya abacukuzi ndetse no kubatera amakimbirane.”

Hejuru y’ibyo hiyongeraho “Kubangamira ifungwa ry’ibikorwa by’ubucukuzi butemewe, gusiragiza abaza gusaba impushya bikabateza igihombo, kutagenzura impushya zarangiye bikabangamira itangwa ry’imisoro n’amahoro bagombye gutanga” ndetse n’andi makosa yose hamwe abarirwa mu munani.

Ndikubwimana avuga ko amakosa yose yashinjwe na Mayor wa Rubavu ari amahimbano, ngo kuko ibyo avuga ko yakabaye yarakoze biri mu nshingano ze nk’umuyobozi w’akarere.

Mu busanzwe mu karere ka Rubavu nk’uko Ndikubwimana abisobanura, harabarurwa ibirombe bigera muri 94, gusa I.A.K.RU Ltd ikaba ihuriwemo n’abacukuzi bo mu birombe bitandatu n’ubwo yo yiyitirira ko ihagarariye abacukuzi bose bo mu karere.

Mu nshingano I.A.K.RU yahawe, harimo gukusanya amafaranga aturuka mu birombe byo mu karere ka Rubavu, gusa abagize iyo company bahabwa izo nshingano bahawe gasopo y’uko batagomba kwiba [amafaranga] umunsi n’umwe.

Ndikubwimana avuga ko “mu myanzuro yo guha inshingano iriya company handitsemo ko igihe cyose bizagaragara ko banyereza amafaranga bazahita bahagarikwa mu nshingano.”

Kanyamashyamba wa Rubavu avuga ko ibyo muri I.A.K.RU Ltd avuga ko iri mu bamugambaniye, bijya gupfa umuyobozi wayo witwa Benimana Etienne yahaye umukobwa we inshingano zo kuba umucungamutungo wayo, ibyatumye umwuka mubi muri ririya huriro utangira kuzamuka.

Ngo byabaye ngombwa ko Benimana aza kumugisha inama y’uko ibintu byari gusubira mu buryo, undi amubwira ko nta munsi n’umwe azatekana mu gihe ari Perezida wa I.A.K.RU umukobwa we akaba umucungamutungo wayo, amusaba ko uwo mukobwa yamburwa inshingano zigahabwa umucungamutungo w’umunyamwuga.

Ati: “Yarambwiye ngo aho kugira ngo mukuremo [umukobwa we], yakwemera akabisenya kuko byaramuvunye, yabisizemo agahanga, bityo rero ko adashobora kumuvanamo.”

Avuga ko impamvu Benimana yavuze ko atakura umukobwa we muri ririya huriro ari uko hari amafaranga bashoyemo [Akantu] kugira ngo akarere kabahe ziriya nshingano, ngo kuko hari uko bumvikanye n’abayobozi bako mbere yo kubashinga ibirombe byo muri Rubavu.

Avuga ko Benimana yamubajije ati: “Ese twazunguka dute kandi twarashoye? Ati se twazakuramo amafaranga dute dushyizemo umukontabure uturutse ahandi ko isaha n’isaha bamukoresha akatuvamo? Ati ariko umwana nibyariye navanye mu nda ntabwo ashobora kumvamo.”

Nyuma yo kubura inama amugira ngo ni bwo yatangiye kugirana ibibazo n’umuyobozi wa I.A.K.RU Ltd, biba ngombwa ko atangira kugenda amugambanira ku bayobozi b’akarere.

Kanyamashyamba wa Rubavu avuga ko n’ubwo ibirombe byo muri Rubavu byitwa ibya rusange, hari abagabo batandatu bafatwa nk’aho ari ba nyirabyo.

Mu mazina yavuze harimo Benimana Etienne, uwitwa Papias, Niyibizi Olivier, Ruboneza Gedeon wahoze ayobora akarere ka Ngororero ndetse n’uwitwa Basore Jean Noel.

Hari ubutumwa bugufi BWIZA yabashije kubona bwa 33,000 Rwf umwe mu bagize ririya tsinda [Papias] yohererejwe, mu rwego rwo kugabana angana na 800,000Rwf abarigize bari banyereje bikarangira bayashwaniye.

Aba bagabo uko ari batandatu muri Gicurasi ngo bandikiye Mayor wa Rubavu bamubwira ko Kanyamashyamba ababangamiye, undi nta no kumusaba ibisobanuro amutura iriya baruwa imuhagarika ku mirimo.

Benimana ushyirwa mu majwi aravuga iki?

Benimana Etienne wakunze gushyirwa mu majwi na Kanyamashyamba wa Rubavu, yabwiye BWIZA ko ku giti cye nta bibazo afitanye n’uriya mukozi, gusa yemeza ko hari ubwo bagiye bapfa serivisi mbi yajyaga aha abacukuzi.

Ku bijyanye no kuba yaragize umukobwa we umucungamutungo wa I.A.K.RU ltd agamije kugaruza amafaranga yashoye, yavuze ko kugira umwana we kontabure nta kibazo kirimo ngo kuko company ayobora ari iy’abanyamuryango, bityo ikaba igomba kubateza imbere.

Ati: “Uwo mukobwa yigeze ahabwa iyo mirimo nk’abandi Bose, kuko I.A.K.RU ishingiye ku banyamuryango ntabwo ari ikigo cya leta, ishingiye ku banyamuryango kandi igateza imbere abanyamuryango ubwabo. Ba nyirayo ni bo bakoramo, kuba rero nayiyobora n’uwo dufitanye isano agakoramo muri I.A.K.RU ayo mabwiriza aremewe.”

Benimana yanabajijwe kuri ruswa ivuza ubuhuha mu ihuriro avuga ko ibya ruswa ari ibinyoma.

Ndikubwimana ushinjwa na Mayor wa Rubavu kubangamira ifungwa ry’ibirombe bitagira ibya ngombwa no kudaca akajagari mu bucukuzi, yemeza ko ku giti cye hari ibaruwa yateguye yasinweho n’umuyobozi w’akarere ka Rubavu, ikoherezwa mu rwego rw’Igihugu rw’Ubugenzacyaha RIB igaragaza ibirombe 51 bicukura kariyeri mu buryo butemewe n’amategeko, agasaba urwo rwego gukurikirana ba nyirabyo.

Ni ibaruwa yandikiwe RIB ku wa 21 Gashyantare 2020 BWIZA na yo yabashije kubonera Kopi.

Ndikubwimana yemeza ko yahagaritswe kubera ibibazo bwite afitanye na Mayor wa Rubavu

Ibibazo Kanyamashyamba wa Rubavu avuga ko afitanye na Mayor Habyarimana Gilbert yemeza ko byatumye amwirukana, bijyanye ahanini no kuba yarashatse kumukoresha mu nyungu ze bwite undi akabyanga.

Ibyabo bigitangira mu ntangiriro za Werurwe 2019, ngo hari Inka z’uwitwa Butera Musafili zigeze gufatirwa mu murenge wa Kanzenze, hanyuma biza kuvugwa ko nyirazo yazisubijwe nyuma yo guha umuyobozi w’uriya murenge amafaranga.

Ndikubwimana avuga ko icyo gihe hashyizweho Itsinda ryo gukurikirana iby’icyo kibazo yari akuriye, rikaba ryari rigizwe n’ukuriye DASSO mu karere ka Rubavu, Lieutenant Faustin Ngarukiyinka, ndetse n’umupolisi witwa Safari.

Icyo gihe ngo basanze nta bimenyetso byerekana ko Gitifu wa Kanzenze yakiriye iyo ruswa, biba ngombwa ko basaba akarere kumubaza impamvu yarekuye izo nka zidatanze amande, ariko bigakorwa mu buryo bwa kiyobozi.

Ati: “Icyo gihe Mayor yari ankubitiye mu biro. Yarambwiye ati nigute ufata umwanzuro nk’uyu? Naravuze nti ese ko wanyohereje kuri terrain, ibyo twanditse tugasinya n’izo nzego z’umutekano ni ibyo twabonye…arambwira ngo ndi imbwa, ndi umusazi, ndi igicucu. Kandi ibyo yabivugaga akubita intoki ku meza impapuro zisimbagurika.”

Icyo gihe ngo Mayor Habyalimana yamubwiye ko agiye kumuhamagariza RIB, undi abonye pandagare ije ahitamo gukizwa n’amaguru.

Ati: “Naravuze nti wasanga bandazamo uyu mugabo akanyumvisha, n’ubwo navamo ariko naba naraye mu biheri. Nahise nsimbuka ndiruka, ndatabaza nti nyamuneka ndarengana, ndazira ukuri nabonye kuri terrain.”

Ndikubwimana avuga ko ibya ziriya nka byabaye imbarutso y’amakimbirane ye n’umuyobozi w’akarere, bikagera aho amwirukana ku mirimo.

Avuga ko undi mwuka mubi uri hagati ye n’umuyobozi w’akarere ka Rubavu ushingiye ku mitangire y’amasoko, ngo kuko ari mu bagize akanama gashinzwe gutanga amasoko muri Rubavu.

Mu busanzwe nk’uko yabisobanuye itegeko rivuga ko “Akanama k’amasoko kigenga mu byemezo gafata”, gusa ubuyobozi bw’akarere ka Rubavu bukaba bwivanga cyane mu mitangire yayo.

Yatanze urugero rw’uko mu minsi yashize hari amafaranga abarirwa muri miliyoni 120 z’amanyarwanda bamwe mu bayobozi b’akarere ka Rubavu bashatse kunyereza mu bijyanye no kubaka imihanda, bikaba ngombwa ko bayabavana ku munwa.

Ngo hari n’andi mafaranga miliyoni 36 z’amafaranga y’u Rwanda abayobozi b’akarere bashatse kunyereza mu mwaka ushize, na yo biba ngombwa ko ayarwanirira.

Ndikubwimana arasaba ko inzego zifite abakozi mu nshingano zazo zimurenganura, ngo kuko yazize kutagendera mu murongo w’umuyobozi w’akarere ka Rubavu.

BWIZA yifuje kumenya icyo Mayor avuga ku byo ashinjwa n’uriya mukozi w’akarere ka Rubavu, gusa incuro zose twamuhamagaye ntiyigeze yitaba terefoni ye igendanwa. Ubutumwa bugufi twamwandikiye haba kuri terefoni no ku rubuga rwa WhatsApp na bwo ntibwigeze busubizwa.