Ikipe ya Juventus yo mu gihugu cy’u Butaliyani, yirukanye Umutaliyani Maurizio Sarri wari umutoza wayo mukuru, nyuma yo gusezererwa rugikubita mu mikino ya UEFA Champions league.
Mu ijoro ryakeye ikipe ya Juve ni bwo yasezerewe muri 1/8 cya UEFA Champions league, nyuma yo gutsinda Olympique Lyonnais yo mu Bufaransa ibitego 2-1, ariko ntikomeze muri 1/4 cy’irangiza bijyanye n’uko mu mukino ubanza yari yatsinzwe igitego 1-0.
Gusezererwa kwa Juventus kwatunguye abatari bake, bijyanye n’urwego ikipe yayisezereye iriho ndetse n’umurengera w’amafaranga yashoye ku isoko igura abakinnyi barimo Cristiano Ronaldo na Matthjis de Ligt.
Juventus nta tangazo rivuga ko yirukanye umutoza Sarri irasohora, gusa umunyamakuru Fablizio Romano wa Sky Italia wemeje ko Sarri yirukanwe yavuze ko itangazo riri busohoke mu mwanya muto uri imbere.
Umunyamakuru wa Sky Italia yanavuze ko ikipe ya Juventus yatangiye kurambagiza umutoza wo gusimbura Maurizio’s Sarri.
Sarri wirukanwe na Juventus yari amaze umwaka umwe ari umutoza mukuru wayo, nyuma yo kuyigeramo akubutse muri Chelsea yo mu gihugu cy’Ubwongereza.
Juventus nk’ikipe y’ibikombe mu Butaliyani igikomeye yayigejejeho ni ugutwara igikombe cya shampiyona y’Abataliyani na cyo yatwaye biyigoye.
