Umwunganizi mu bijyanye n’amategeko wo mu gihugu cya Kenya, Martha Karua, yangiwe kwinjira muri Uganda maze asubira i Nairobi, kuri uyu wa Mbere ushize, nyuma y’uko abashinzwe abinjira n’abasohoka bamushyize mu cyiciro cy’ “abimukira batemewe,” nk’uko bigaragara ku itangazo ryashyizwe ahagaragara ku Kibuga cy’Indege Mpuzamahanga cya Entebbe.
Iki cyemezo cyafashwe n’ubuyobozi bushinzwe abinjira n’abasohoka, bwategetse indege yazanye Karua muri Uganda kumusubiza muri Kenya uwo munsi.
Iri tangazo ryerekana ko Karua wahoze ari Minisitiri w’ubutabera muri Kenya akaba n’umunyamategeko umaze igihe, yangiwe kwinjira hashingiwe ku mategeko agenga abinjira n’abinjira muri Uganda.
Mu gice kivuga impamvu yo kumwangira, abashinzwe abinjira n’abasohoka banditse “persona non grata” cyangwa umuntu udafite ikaze mu gihugu ugenekereje mu Kinyarwanda.
Karua yari agiye muri Uganda kwitabira urubanza rw’umuyobozi wa Kampala, Erias Lukwago no gushyigikira itsinda ry’abanyamategeko bunganira abatavuga rumwe n’ubutegetsi, Dr Kizza Besigye na Hajji Obeid Lutale nk’uko tubikesha Chimpreports.
Iyirukanwa rye ryabaye nyuma y’amasaha make Ihuriro ry’Abanyamategeko bo muri Uganda, ritangaje ko yangiwe kwinjira ku Kibuga cy’Indege Mpuzamahanga cya Entebbe. Ibi byatumye abanyamategeko muri Uganda na Kenya batangira kuvuga byinshi.
Umuryango w’Abanyamategeko muri Kenya wavuze ko wakiriye raporo zivuga ko Karua yangiwe kwinjira mu gihugu ubwo yari agiye gukurikirana iburanishwa rya Lukwago no gushyigikira ibikorwa bigamije kurengera uburenganzira bw’abanyamategeko b’umwuga.
Urwego rw’abavoka bo muri Kenya rwasabye kandi inzego zibishinzwe gutanga ibisobanuro birambuye ku bijyanye n’iki cyemezo.
Iyirukanwa rya Karua ryabaye mu gihe abaturage bakomeje gushishikazwa n’urubanza rwa Lukwago, ukurikiranweho icyaha cy’ubugambanyi kandi urubanza rwe rukaba rufitanye isano n’imanza zirimo Besigye na Lutale.
Kugeza ku wa Mbere nimugoroba, abategetsi ba Uganda bari bataratanga ku mugaragaro ibisobanuro birambuye ku itangazo ry’abashinzwe abinjira n’abasohoka ryashyizwe ku kibuga cy’indege.
