Leta ya Tanzaniya yabujije ibiterane bya politike mu gihugu cyose kugeza igihe hazatangirwa amabwiriza mashya, aho yashimangiye ko bikenewe mu kubungabunga umutekano w’igihugu.
Guverinoma ivuga ko yabonye ko hari ibintu bibangamiye umutekano, nk’abantu bivugwa ko bafatanywe intwaro barimo gutegura ibikorwa by’ubugizi bwa nabi nk’uko inkuru dukesha BBC ivuga.
Ni icyemezo ariko cyamaganwe n’imitwe ya politiki itavuga rumwe na leta, ivuga ko guhagarika ibiterane bya politike binyuranyije n’amategeko. Ishyaka ACT Wazalendo, rimwe mu yatavuga rumwe n’ubutegetsi, ryatangaje ko rizitabaza urukiko risaba ko icyo cyemezo giteshwa agaciro.
Ibi bije mu gihe bivugwa ko hari imyigaragambyo yari iteganyijwe yo gusaba ko haba impinduka za demokarasi no kwibuka abishwe mu guhosha imyigaragambyo yakurikiye amatora yo mu mwaka ushize.
Iki cyemezo cyo kubuza ibiterane bya politiki bibaye nko kwisubiraho nyuma y’impinduka zari zazanywe na Perezida Samia Suluhu Hassan mu 2023, aho yari yavanyeho icyemezo nk’iki cyari kimaze imyaka itandatu kibuza ibiterane bya politiki cyari cyarafashwe na Perezida John Pombe Magufuli.
