Uwahoze ari Visi Perezida, Rigathi Gachagua, yatangaje ko afite umupangu wa kabiri azakoresha mu gihe yaba abujijwe kwiyamamariza kuyobora igihugu mu matora ya Perezida yo mu 2027.
Mu kiganiro yagiranye na televiziyo yo muri iki gihugu ku mugoroba wo ku wa Gatatu, Gachagua yavuze ko nubwo afite icyizere ku byerekeye urubanza rwe mu nkiko, yamaze kumenya itsinda ry’abayobozi bakiri bato biteguye gukomeza icyifuzo cy’akarere ka Mt. Kenya cyo gutanga umukandida ku mwanya wa Perezida.
Yahakanye amakuru avuga ko ibibazo by’amategeko afite bishobora gutuma ako karere kabura umukandida ku mwanya ukomeye mu gihugu.
Nk’uko uyu muyobozi abivuga, hari abanyapolitiki batekereza ko ashobora gukurwa mu ihiganwa, bakaba bizeye ko ibyo byacogoza imbaraga za politiki z’ako karere.
Yagize ati: “Hari abantu bagiye bavuga ko ako karere (Mt Kenya) katazagira umukandida ku mwanya wa Perezida. Abandi batekereza ko Gachagua ashobora kubuzwa kwiyamamaza n’inkiko.”
Yanavuze ko hari abadepite bo mu karere ke bifuzaga ko yakumirwa kugira ngo babone amahirwe menshi yo gutorwa.
Yagize ati: “Hari abadepite bo muri ako karere bifuza ko nkumirwa kuko batekereza ko byaborohereza gutsinda amatora. Mfite inkuru mbi kuri bo.”
Gachagua yavuze ko yamaze igihe yigisha kandi ategura abayobozi b’ejo hazaza, akaba afite icyizere ko bafite ubushobozi bwo kuyobora igihugu.
Yagize ati: “Mu gihe haba ikintu kibabaje nkakumirwa nkabuzwa kwiyamamaza, mfite abagabo n’abagore biteguye kwiyamamaza. Njye n’abaturage tuzumvikana ku mukandida umwe.”
Yatangaje ko yamaze kumenya abayobozi bakiri bato 18 yizeye ko bafite ubushobozi bwo kwiyamamariza umwanya wa Perezida cyangwa uwa Visi Perezida.
Yagize ati: “Mfite abasore n’inkumi bakuze neza mu bitekerezo. Bafite ubushobozi, imbaraga, ubuhanga mu kuvuga kandi bafite imbaraga zihagije zo kuba Perezida cyangwa Visi Perezida.”
Uyu wahoze ari Visi Perezida yavuze ko bamwe muri aba bayobozi bakiri bato, barimo ba Senateri John Methu (Nyandarua), Karung’o Thang’wa (Kiambu), n’uhagarariye abagore mu Nteko Ishinga Amategeko ya Kirinyaga, Njeri Maina, n’abandi, bashobora no gukora neza kurusha we mu matora yo ku rwego rw’igihugu bitewe n’imyaka yabo ndetse n’uko bakunzwe.
Yagize ati: “Abo bantu bakiri bato barusha Gachagua imbaraga za politiki. Mu by’ukuri, umwe muri bo yagira amanota meza kurusha njye kuko bakiri bato, bafite imbaraga nyinshi, kandi igihugu gifite inyota y’abayobozi bakiri bato.”
Gachagua yavuze ko icyo ashyize imbere ari ukugenzura ko akarere ka Mt Kenya katazongera kwisanga nta buyobozi bwa politiki busobanutse neza.
Yagize ati: “Nubwo hagira icyambaho, nashyizeho urwego rw’ubuyobozi rusobanutse neza. Umuryango ntuzigera uhungabana. Niba ntahari, bazamenya uwo bahitamo.”
Amagambo ye aje mu gihe hakomeje kuvugwa byinshi ku mpinduka muri politiki mbere y’amatora rusange ya 2027 n’intambara z’amategeko na politiki zikomeje ku wahoze ari Visi Perezida.
