Mu gitondo cya kare kuri uyu wa 27 Kanama 2020, impunzi z’Abarundi 500 zabaga mu nkambi ya Mahama mu Karere Kirehe mu Rwanda, zabyutse zitaha iwabo zibifashijwemo na leta y’u Rwanda, iy’u Burundi n’ishami ry’Umuryango w’Abibumbye ryita ku mpunzi, UNHCR.
Amakuru agera kuri Bwiza.com avuga ko izi mpunzi zaraye zipakiye ibikoresho birimo ibiryamirwa nyuma yo kumenyeshwa ko zitaha mu gitondo kare, ahagana saa tatu zikaba zigeze ku mupaka wa Nemba uhuza ibihugu byombi, ahaherera mu Karere ka Bugesera.
Nk’uko amafoto abigaragaza, izi mpunzi zari zimaze imyaka 5 zihunze umutekano muke wari mu Burundi, zacyuwe mu modoka z’ikigo gitwara abagenzi cya RITCO, gikorera mu Rwanda. Mu bigaragara, mbere y’uko zinjira mu modoka, habanje kubahrizwa uburyo bwo kwirinda icyorezo cya Covid-19.
Mu mpera za Nyakanga 2020, impunzi z’Abarundi zirenga 300 ziba mu nkambi ya Mahama zandikiye Perezida w’u Burundi, Evariste Ndayishimiye zimusaba kuzifasha gutaha. Byasabye ko impande zirebwa n’iki kibazo zihura, ziga ku buryo zafasha izi mpunzi gutaha.
Minisiteri y’Ubutabazi mu Rwanda yatangaje ko impunzi zikomeje gusaba gutaha, ubu izibarirwa ku 1800 zikaba ari zo ziri ku rutonde.
Muri rusange, mu Rwanda habarirwa impunzi z’Abarundi ziri mu 72000 nk’uko byemejwe na UNHCR.
Zaraye ziteguye gutaha
