Perezida Felix Tshisekedi wa Repubulika ya Demokarasi ya Congo, guhera kuri uyu wa Mbere ategerejwe mu ruzinduko rw’akazi rw’iminsi ibiri mu gihugu cya Tanzania.
Nk’uko bigaragara mu itangazo ryashyizwe ahagaragara na minisiteri y’ububanyi n’amahanga ya Tanzania, ni uruzinduko Perezida Tshisekedi yatumiwemo na mugenzi we, Samia Suluhu kuva kuri uyu wa Mbere kugeza kuwa Kabiri, itariki 18 Kanama 2026.
Itangazo rikomeza rivuga ko Perezida Samia Suluhu azakirira Tshisekedi muri Zanzibar, ibiganiro byabo bikazibanda ku ngingo zitandukanye, zirimo ubucuruzi n’ishoramari, ubuhinzi, amabuye y’agaciro, ingufu, ibikorwaremezo n’ubwikorezi, ubuzima ndetse n’umutekano.
Nyuma y’ibiganiro byabo, abakuru b’ibihugu byombi baragirana ikiganiro n’abanyamakuru babagezeho ibyo baganiriye n’imyanzuro bafashe mu kurushaho gushimangira umubano hagati ya RDC na Tanzania kandi hasohorwe itangazo rihuriweho.
Biraba ari ku nshuro ya gatatu Perezida Tshisekedi asuye Tanzania nyuma yo kuyisura mu 2019 na 2022. Uruzinduko rukaba rwitezweho kurushaho gukomeza umubano w’amateka wa kivandimwe na dipolomasi umaze igihe hagati y’ibihugu byombi.
