Abarwanyi b’umutwe wa FDLR bagabye igitero ku baturage bo mu gace ka Mulala ho muri Teritwari ya Rutshuru mu Ntara ya Kivu y’Amajyaruguru, kigahitana abantu bane abandi 10 barabakomeretsa.
Amakuru y’ubu bwicanyi yemejwe n’umutwe wa AFC/M23, biciye mu muvugizi wawo, Lawrence Kanyuka.
Yavuze ko icyo gitero cyabaye mu ijoro ryo ku wa Mbere tariki ya 31 Kanama, ahagana saa tatu n’iminota 45 z’ijoro. Ni igitero cyabereye bilometero bibarirwa muri 20 uvuye i Vitshumbi.
AFC-M23 ivuga ko uretse abantu bane bishwe n’abandi 10 bagakomereka, abagore babiri bashimuswe, ubwo bari bagiye gukora mu mirima.
Uyu mutwe washinje ubutegetsi bwa Kinshasa gukomeza kwanga gufata ingamba zo guhagarika ibikorwa bya FDLR, uvuga ko kuba uyu mutwe ukomeje gukorera mu Burasirazuba bwa RDC biri mu biteza umutekano muke.
AFC-M23 kandi yavuze ko FDLR ikomeje koherezwa ku mirongo itandukanye y’urugamba, ishimangira ko kuba abarwanyi b’uyu mutwe bari hafi y’abaturage bishobora guteza ingaruka zikomeye ku basivili.
Yunzemo iti: “AFC-M23 irongera gushimangira ko yiyemeje mu buryo budasubirwaho kurinda no kurengera abasivili.”
Igitero cyiciwemo bariya bantu cyabaye mu gihe umutekano mu bice bitandukanye bya Kivu y’Amajyaruguru ukomeje kuba mubi, aho imirwano n’ibikorwa by’imitwe yitwaje intwaro bikomeje guteza ubwoba no kwimura abaturage.
