Urwego rushinzwe iby’indege muri Nigeria, Nigerian Civil Aviation Authority (NCAA), rwafatiye ibihano ikigo cy’indege cya RwandAir kubera kutubahiriza amabwiriza ajyanye no kurengera uburenganzira bw’abagenzi.
Umuvugizi wa NCAA, Michael Achimugu, yatangaje iby’ibi bihano ku wa Gatanu, abinyujije ku rubuga rwe rwa X.
NCAA yaciye RwandAir ihazabu ya miliyoni 15 z’am naira kubera kutakemura mu gihe cyagenwe ikibazo cy’umugenzi wari watanze ikirego kijyanye n’imizigo ye.
Uru rwego ruvuga ko RwandAir itakurikije amabwiriza agenga kurengera abagenzi mu rwego rw’ubwikorezi bwo mu kirere muri Nigeria, cyane cyane ku bijyanye no gukemura ibibazo by’imizigo mu gihe cyagenwe.
Usibye ihazabu, NCAA yasabye RwandAir gusimburiza umugenzi ivarisi ye yangiritse, ndetse ikamuha amadolari 170 y’indishyi.
NCAA yavuze ko izi ndishyi zishingiye ku gice cya 19 cy’amabwiriza ya NCAA Regulations 2023, ateganya indishyi n’ibindi bikorwa bigomba gufatirwa abagenzi bagize ibibazo bijyanye n’imizigo.
Si ubwa mbere NCAA ifatira ibihano ibigo by’indege, kuko mu bihe bitandukanye yagiye ihana ibigo by’indege bikorera imbere muri Nigeria ndetse n’iby’amahanga.
Mu Gashyantare 2025, ibigo bitanu by’indege, birimo Royal Air Maroc, Arik Air, Ethiopian Airlines, Aero Contractors na Air Peace, na byo byari byarafatiwe ibihano kubera amakosa atandukanye.
NCAA kandi yari yaraburiye ibigo by’indege ko bishobora guhanwa mu gihe bidakemuye cyangwa ngo bisubize amafaranga y’ingendo ku bagenzi mu gihe giteganywa n’amabwiriza.
