Umugabo w’imyaka 42 y’amavuko utuye mu Karere ka Gicumbi, Umurenge wa Nyamiyaga, Akagari ka Kabeza, yasabiwe n’Ubushinjacyaha gufungwa iminsi 30 y’agateganyo kubera icyaha cyo gukoresha umukobwa we imibonano mpuzabitsina ku gahato.
Ni nyuma y’uko Ubushinjacyaha ku Rwego Rwisumbuye rwa Gicumbi buregeye Urukiko rw’Ibanze rwa Gicumbi, uyu mugabo akekwaho icyaha cyo gukoresha imibonano mpuzabitsina ku gahato umukobwa we w’imyaka 19 y’amavuko.
Mu ibazwa rye, uregwa yahakanye icyaha akurikiranweho nk’uko iyi nkuru dukesha Ubushinjacyaha Bukuru ikomeza ivuga.
Icyaha akurikiranweho giteganywa kandi kigahanishwa ingingo ya 134 y’Itegeko Nº 68/2018 ryo ku wa 30 Kanama 2018 ryerekeye ibyaha n’ibihano muri rusange.
