Minisiteri y’Ingabo z’Amerika (Pentagon) yabwiye Inteko Ishinga Amategeko ko intambara Amerika irimo na Iran imaze gutwara igihugu hafi miliyari 45.1 z’amadolari.
Amakuru yatangajwe ku wa Gatanu, tariki ya 18 Nzeri 2026, avuga ko iki kiguzi cyari kimaze kugera kuri miliyari 43.6 z’amadolari kugeza ku wa 3 Nzeri, hakongerwaho andi miliyari 1.5 z’amadolari yakoreshejwe mu kongera ibikomoka kuri peteroli n’ibindi bikoreshwa mu bikorwa bya gisirikare.
Gusa, iyi mibare ntirimo ikiguzi cyose cy’intambara. Pentagon ntiyashyizemo amafaranga azakenerwa mu gusana ibirindiro bya gisirikare n’izindi nyubako zangijwe n’intambara. Ntabwo kandi Inteko Ishinga Amategeko yahawe ibisobanuro birambuye ku bindi byangijwe n’ibikorwa bya gisirikare.
Iyi mibare mishya iruta iyo Congressional Budget Office (CBO) yari yagaragaje mbere, aho yari yavuze ko intambara yari imaze gutwara Amerika hafi miliyari 38 z’amadolari kugeza ku wa 1 Kanama 2026.
Muri Nyakanga, Pentagon yabaraga ikiguzi cy’intambara kuri hafi miliyari 37.5 z’amadolari.
CBO ivuga ko iyo ntambara ikomeje, Amerika ishobora gukomeza gukoresha hagati ya miliyari 2 na miliyari 3 z’amadolari buri kwezi nyuma ya Kanama, ndetse amafaranga akaba ashobora kwiyongera mu gihe imirwano yaba ikaze.
Ikigo kandi cyaburiye ko intambara ishobora kugira ingaruka ku bukungu bw’Amerika, harimo kongera izamuka ry’ibiciro mu gihembwe cya mbere cya 2027, mu gihe Abanyamerika bakomeje kugira impungenge ku bukungu bw’igihugu.
