Umuhanzi w’Umwongereza Ed Sheeran yitegura kongera kuririmba mu ruhame muri Philadelphia kuri uyu wa Gatandatu, nyuma y’impaka zavutse ku bijyanye n’ibitekerezo bishyigikira Palestine byagaragajwe n’umuhanzi wari kumufasha ku rubyiniro.
Umuraperi Macklemore yakuwe mu rugendo rw’ibitaramo rwa Sheeran muri Leta Zunze Ubumwe za Amerika nyuma y’uko avugiye ku rubyiniro muri New Jersey amagambo ashyigikira Palestine, arimo gusaba ko Palestine ibohorwa.
Abafite ibibuga byari biteganyijwe kwakirirwaho ibitaramo bya Sheeran ni bo bagaragaje ko batishimiye ibyo Macklemore yavuze, bituma avanwa muri uru rugendo rw’ibitaramo.
Sheeran yahakanye ko ari we wafashe icyemezo cyo gukura Macklemore muri gahunda y’ibitaramo bye, avuga ko iki cyemezo cyafashwe n’umuterankunga w’urugendo rw’ibitaramo bye.
Nyuma yaho, abandi bahanzi bane bafashaga Sheeran muri uru rugendo na bo bavuye muri iyi gahunda. Muri bo harimo itsinda ry’abacuranzi bamufashaga ndetse na Finneas, umuhanzi wamenyekanye cyane kubera gukorana na mushiki we, Billie Eilish.
Muri iki gihe hari abahanzi benshi bakomeje gutangaza ibitekerezo byabo ku ntambara yo muri Gaza ndetse n’ihohoterwa rikorwa na Isiraheli muri West Bank.
Sheeran we yakomeje kuvuga ko adashaka kwinjira mu biganiro bya politiki ku mugaragaro.
Mu butumwa yashyize kuri Instagram, yavuze ko kuba adatangaza ku mugaragaro ibitekerezo bye kuri iyo ntambara bidashatse kuvuga ko ayishyigikiye cyangwa ko nta cyo bimubwiye. Yavuze ko afite ibitekerezo bye ku kibazo ariko ko abantu baza mu bitaramo bye bataba baje mu nama ya politiki.
