Urukiko Rusesa Imanza rwa Repubulika ya Demokarasi ya Congo rwakatiye uwahoze ari Minisitiri w’Ubutabera, Constant Mutamba, igifungo cy’imyaka 10 y’imirimo y’agahato, mu gihe uwo bareganwaga, Chançard Bolukola, wahoze ari umuhuzabikorwa w’agateganyo w’Ikigega cya FRIVAO, yakatiwe igihano cy’imyaka irindwi nk’icyo. Bahamwe n’icyaha cyo kunyereza arenga miliyoni 20 z’amadolari ya Amerika n’amasoko ya leta ataravuzweho rumwe, ibyaha Mutamba atigeze yemera.
Aya mafaranga yacungwaga n’Ikigega cyihariye cyo Kwishyura no Guha Indishyi Abahohotewe mu Bikorwa Bitemewe bya Uganda (FRIVAO), cyashingiwe kwakira amafaranga y’indishyi yishyujwe igihugu cya Uganda kubera ibikorwa byacyo muri Congo mu ntambara yo mu myaka ya 2000.
Byongeye kandi, aba bagabo bombi bambuwe uburenganzira bwabo bwo gutora no kwemererwa gukora imirimo ya leta mu gihe cy’imyaka itanu, babuzwa gukora imirimo ya leta.
Avuga kuri ibi bihano, nyuma y’amasaha 48 akatiwe, Constant Mutamba yavuze ko icyemezo cy’urukiko gishingiye kuri politiki. Mu ibaruwa yanditse n’intoki yo ku Cyumweru, itariki ya 20 Nzeri, Mutamba yamaganye iki gihano cya “politiki”, cyakurikiye urubanza rw’iminsi ibiri gusa, urubanza avuga ko nta batangabuhamya bagaragayemo kandi nta bimenyetso by’inyerezwa ry’umutungo byatanzwe.
Ku wahoze ari Minisitiri w’Ubutabera wa Congo, Constant Mutamba, iki gikorwa nticyatunguranye; abona ko ari ugukomeza intambara ya politiki n’amategeko yatangiye muri Mata 2025, yarangiye ahamijwe icyaha bwa mbere n’Urukiko Rusesa Imanza mu cyo asanga “ari akarengane.”
Avuga ku mpamvu ziri inyuma y’uku kumuhamya ibyaha avuga ko bishingiye kuri politiki, Mutamba yashinje abegereye Umukuru w’Igihugu, Félix Tshisekedi, gushaka kumugirira nabi bitewe n’ibyo avuga ko bashaka kugeraho muri politiki.
