Perezida w’u Bushinwa, Xi Jinping, agiye gusura Leta Zunze Ubumwe za Amerika kuva ku itariki ya 23 kugeza ku ya 25 Nzeri ku butumire bwa Perezida Donald Trump, nk’uko Minisiteri y’Ububanyi n’Amahanga y’u Bushinwa yabitangaje mu itangazo ryo kuri uyu wa Mbere.
Muri urwo ruzinduko, Xi “azagirana ibiganiro byimbitse na Perezida Trump ku ngingo zikomeye zijyanye n’umubano w’u Bushinwa na Amerika, ndetse no ku mahoro n’iterambere ku Isi,” nk’uko byatangajwe n’Umuvugizi wa Minisiteri y’Ububanyi n’Amahanga y’u Bushinwa mu kiganiro n’abanyamakuru gisanzwe nyuma gato y’itangazo.
Guo Jiakun, Umuvugizi wa Minisiteri y’Ububanyi n’Amahanga y’u Bushinwa yagize ati: “Ingendo z’abakuru b’ibihugu byombi mu gihe cy’amezi atandatu ni “iz’amateka kandi zifite akamaro kanini.”
Guo yongeyeho ati: “U Bushinwa bwiteguye gukorana na Amerika kugira ngo … bukomeze ibiganiro n’ubufatanye, gucunga neza ibitumvikanwaho, gukomeza kunoza imibereho myiza y’abaturage b’ibihugu byombi, no guteza imbere amahoro, ituze n’iterambere ku Isi.”
Uru ruzaba ari uruzinduko rwa mbere rw’akazi Xi agiriye muri Amerika kuva muri Nzeri 2015, ubwo yasuraga iki gihugu ku butumire bwa Perezida Barack Obama wari uriho icyo gihe.
Nyuma, Xi yahuye na Trump muri manda ye ya mbere mu 2017.
Yasuye Amerika kandi mu 2023, ahura na Perezida Joe Biden wari uriho icyo gihe iruhande rw’inama y’abayobozi b’ubukungu ba Aziya na Pasifika, ariko ntabwo byari ku rwego rw’uruzinduko rw’akazi muri Amerika.
Uru ruzinduko ruzaba hagati yo kuwa Gatatu no kuwa Gatanu ruzaba nyuma y’uko Trump agiriye uruzinduko rw’akazi mu Bushinwa muri Gicurasi.
Xi amaze gusura Amerika inshuro eshanu kuva yatangira kuyobora u Bushinwa mu 2013.
