Umukinnyi Kylian Mbappe ntaza kuboneka mu mukino uhuza u Bufaransa na Croatia kuri uyu wa Kabiri, ndetse ntazakinira Paris Saint-Germain mu mukino wo gufungura shampiyona nyuma yo kumupima bakamusangamo coronavirus.
Mbappe yiyongereye ku bakinnyi barindwi ba PSG, barimo Neymar bapimwe mu cyumweru gishize, bagasangwamo ubwandu bwa Covid-19.
Ku wa Gatandatu, Mbappe yatsinze igitego mu mukino wahuzaga u Bufaransa na Suwede warangiye ari 1-0 nk’uko iyi nkuru dukesha SkySports ivuga.
Itangazo ry’Ishyirahamwe ry’Umupira w’Amaguru mu Bufaransa, FFF, ryagize riti: “Kylian Mbappé ntazitabira u Bufaransa-Croatia, ku wa kabiri nimugoroba saa 8h45 kuri Stade de France.
Iri tangazo ryakomeje rivuga ko ibyavuye mu kizamini cya Covid-19, cyakozwe na UEFA mu gitondo cyo kuri uyu wa Mbere ushize, byagaragaje ko yanduye, ndetse yavanwe mu bandi nyuma yo kubona igisubizo, arangije imyitozo, mbere yo gusubira iwe nimugoroba.
