Mu gitondo cyo kuri uyu wa Kane tariki ya 24 Nzeri 2020 ni bwo icyiciro cya gatatu kigizwe n’impunzi 511 z’Abarundi cyafashijwe gutaha.
Ni impunzi zigizwe n’abana, abagore n’abagabo zari zimaze imyaka igera kuri 5 ziba mu nkambi ya Mahama mu burasirazuba bw’u Rwanda. Izi mpunze yaje mu Rwanda zihunze imvururu zakurikiye amatora y’Umukuru w’Igihugu yo mu mwaka 2015.
Impunzi z’Abarundi zimaze gutaha zose hamwe mu byiciro uko ari bitatu ni 1503, mu gihe izimaze kwiyandikisha zisaba gutaha zirenga 3000.
Ku wa 27 Kanama ni bwo icyiciro cya mbere cy’izi mpunzi zatashye, aho zakiriwe neza mu gihugu cy’uBurundi n’intumwa zoherejwe n’umukuru w’igihugu Evaritse Ndayishimiye.
Mu butumwa Umukuru w’Igihugu yageneye izo mpunzi yazibukije ko ntako bisa kuba mu gihugu cyakubyaye ndetse ari naho yahereye asaba n’abasigaye mu Rwanda gukomeza kwiyandkisha ari benshi ngo bafashwe gutaha.
Yagize ati: “Duhaye ikaze bene wacu batahutse bava mu buhungiro i Mahama. Ni akanyamuneza kenshi ku miryango yabo no ku Burundi. Ababishinzwe basabwe kubashyigikira mu buryo bwose bagasubizwa mu miryango yabo. Turashishikariza n’abandi bifuza gutahuka, u Burundi ni ubwacu twese. Ikaze iwacu heza!”
Kugeza ubu mu Rwanda habarurwa impunzi z’Abarundi zigera ku bihumbi 72 mu gihe abamaze gutaha basaga ibihumbi bitandatu.
Ku ruhande rw’u Rwanda, abatashye babanza gupimwa Covid-19 no guhabwa amafunguro ubundi bagashyirwa mu modoka hubahirizwa amabwiriza yo kurwanya icyorezo covid-19.Impunzi zitashye zambukira ku mupaka wa Nemba uri mu karere ka Bugesera.
