Jeannette Kagame yahaye urubyiruko umukoro

Ibi Jeannette Kagame yabivuze ubwo u Rwanda ryizihiza umunsi mpuzamahanga w’abageze mu za bukuru wizihizwa ku nshuro yawo ya 20 hano mu Rwanda.

Mu butumwa Madame Jeannette Kagame yatanze kuri uyu munsi, yibukije ababyeyi gukomeza kuba indorerwamo urubyiruko ruvomaho byinshi.

Yagize ati: “Babyeyi, muri isoko y’indangagaciro z’Abanyarwanda, abato bazigiraho maze bakumva ukuntu kugira igihugu bihenda, bityo bakarushaho kubumbatira u Rwanda no kuruhesha ishema”.

Yakomeje avuga ko ababyeyi ari isoko y’ibyishimo by’u Rwanda , kuko aribo baruhekeye. Yagize ati: “Babyeyi, muri igicaniro cy’ibyishimo by’u Rwanda kuko mwahetse abato mu ‘ngobyi yo kwishakamo ibisubizo’. Muri ibi bihe bikomeye bya Covid-19, ndasaba buri wese kubabera ijisho, urumuri n’akabando kabasindagiza.”.

Umunsi mpuzamahanga w’abageze mu za bukuru ku rwego rw’Isi ufite insanganyamatsiko igira iti “Guhangana n’ibyorezo, tubungabunga abageze mu zabukuru.” Ku rwego rw’Igihugu insanganyamatsiko iragira iti: “Uruhare rw’umuryango mu guhangana n’ibyorezo, habungwabungwa abageze mu zabukuru”.