Ikigo cy’Igihugu cy’Ibarurishamibare kuri uyu wa 21 Ukwakira 2020 cyatangaje ko mu bushakashatsi cyakoze muri Kanama 2020, byagaragaye ko ubushomeri bwagabanutseho 6.1% ugereranyije n’uko bwari buhagaze muri Gicurasi.
Iki kigo kivuga ko muri Gicurasi 2020, ubushomeri bwari ku kigero cya 22.1%, uyu mubare ukaba warazamuwe ahanini n’ingaruka z’icyorezo cya Covid-19, aho bamwe mu bakozi bahagarikiwe amasezerano, abandi bakirukanwa.
Uwo mubare wageze kuri 22.1%, uvuye kuri 13.1 % wariho mbere y’uko icyorezo cya Covid-19 kigera mu Rwanda (muri Werurwe 2020). Ibi bisobanuye ko ingaruka za Covid-19 zazamuye igipimo cy’ubushomeri ku 9%.
Byumvikane ko mu kwezi kwa Kanama, ubushomeri bwari kuri 16%. Imirimo yagize uruhare mu igabanuka ry’ubushomeri irimo: Ubwubatsi, Ubucuruzi, Inganda, n’imirimo ijyanye no gucumbikira ndetse no kugaburira abantu.
Umubare w’abafite akazi kabinjiriza amafaranga muri Kanama 2020 wageze kuri hafi miliyoni 3.7 uvuye kuri miliyoni 3.2 muri Gicurasi 2020.
