Ikipe ya APR FC ihagarariye u Rwanda mu irushanwa rihuza rya Total CAF Champions league rihuza amakipe yabaye aya mbere iwayo ku mugabane wa Afurika, izahura na Gor Mahia yo mu gihugu cya Kenya mu ijonjora ry’ibanze.
Ni nyuma ya tombora ya CAF Champions yabereye i Cairo mu Misiri.
Ikipe izarokoka hagati ya APR na Gor Mahia, izahurira mu ijonjora rya kabiri n’ikipe izarokoka hagati ya CR Belouizdada yo muri Algeria na AL Nasr yo muri Libya.
Gor Mahia igomba guhura n’ikipe ya APR FC, isanzwe itozwa n’Umunya-BrĂ©sil Robertinho wigeze gutoza Rayon Sports.
Rutahizamu mushya wa APR FC, Jacques Tuyisenge arayizi neza, kuko yayikiniye imyaka itatu mbere yo gutandukana na yo akerekeza muri Petro Atletico de Luanda yo muri Angola.
Gor Mahia iheruka guhura n’ikipe yo mu Rwanda muri 2018, ubwo yari mu tsinda rimwe na Rayon Sports muri CAF Confederation Cup. Umukino ubanza amakipe yombi yahuriyemo kuri Stade ya Kigali warangiye anganya igitego 1-1, mu wo kwishyura Rayon Sports iyitsindira i Nairobi ibitego 2-1.
Abenshi mu bakinnyi iyi kipe yari yubakiyeho nka Jacques, Francis Kahata, Haron Shakava, Joash Onyango n’abandi benshi bamaze gutandukana na yo, berekeza mu makipe yo hanze ya Kenya.
