Ikipe ya Pyramids FC yo mu gihugu cya Misiri, biravugwa ko yaba yinjiye mu biganiro byo gusinyisha rutahizamu Mario Balotelli kuri ubu udafite ikipe.
Uyu Mutaliyani w’imyaka 30 y’amavuko, ni umwe mu bakinnyi bafite izina riremereye, nyuma yo kunyura mu makipe akomeye nka Liverpool, Manchester City, Inter Milan na AC Milan.
Balotelli kandi ari mu bakinnyi bake bashoboye gutwara ibikombe bikomeye nka UEFA Champions league, Premier league na Serie A, ndetse yakiniye ikipe y’Igihugu y’u Butaliyani imikino irenga 30.
Magingo aya ari gukorera imyitozo mu kipe ya Franciacorta yo mu kiciro cya kane mu Butaliyani.
Amakuru akomeje kugarukwaho n’ibitangazamakuru bitandukanye byo mu Barabu, avuga ko ikipe ya Pyramids iheruka gukina umukino wa nyuma wa CAF Confederation Cup, yifuza kumusinyisha ku buntu.
Ikinyamakuru World Today cyavuze ko umwe mu bayobozi ba Pyramids yatangaje ko bari kureba uko basinyisha Balotelli nyuma yo guhabwa ayo mahirwe n’aba-Agents be, gusa bakaba bateganya kumuha amasezerano atarengeje umwaka umwe ahanini kubera imyitwarire ye ituma atarambana n’amakipe.
Mu gihe Balotelli yakwerekeza muri iriya kipe, yahita yiyongera ku bandi bakinnyi bashya iheruka gusinyisha, barimo Sherif Ikrami na Ahmed Fathi bavuye muri Al Ahly ku buntu, Ramadan Sobhi wavuye muri Huddersfield Club na Mahmoud Wadi bakuye muri Al-Masry.
