Depite Robert Kyagulanyi Ssentamu uzwi nka Bobi Wine aragezwa mu rukiko rwa Iganga kuri uyu wa Gatanu tariki 20 Ugushyingo 2020. Uyu mugabo nk’uko ibinyamakuru bivuga, akurikiranweho gukora inama zitemewe zishobora gukwirakwiza indwara. Abanyamategeko be barimo Benjamin Katana babwiye Chimpreports ko batigeze bamenyeshwa ko umukiliya wabo agezwa mu rukiko ariko ko ” Bafite abantu babagejejeho ayo makuru kandi ko barebye uburyo umutekano wakajijwe ku rukiko, bishoboka.” Bobi Wine wiyamamariza umwanya wa Perezida wa Uganda yatawe muri yombi mu masaha 48 ashize, afungirwa Nalufenya, yafashwe ubwo yari mu Karere ka Luuka ashinjwa guhuriza abaturage benshi hamwe mu bihe bya COVID-19. Ni ibintu byateje akaduruvayo mu gihugu aho 16 bamaze kubigwamo, abandi bagakomereka.
