Urubanza rw’uwahoze ari perezida w’u Bufaransa, Nicolas Sarkozy, ukurikiranweho ibyaha bya ruswa no gukoresha ububasha bwe nabi rwasubitswe kuri uyu wa Mbere nyuma y’amasaha abiri rutangiye kugirango habanze hatangwe raporo yo kwa muganga kuri umwe mu baburana.
Sarkozy ashinjwa kuba yaragerageje gukura mu buryo bunyuranyije n’amategeko amakuru ku mucamanza wamukoragaho iperereza mu 2014.
Uru nirwo rubanza rwa mbere rubaye rw’uyu munyapolitiki w’imyaka 65, urimo gukorwaho andi maperereza menshi kuva yava ku butegetsi mu 2012.
ABCNews dukesha iyi nkuru iravuga ko Sarkozy yari mu Rukiko rwa Paris, ari kumwe n’umwunganizi we, Thierry Herzog w’imyaka 65 n’umucamanza Gilbert Azibert w’imyaka 73. Bose bashobora gufungwa imyaka igera ku 10 n’amande angana na miliyoni y’Amayero. Aba ariko bavuga ko nta kosa bakoze.
Sarkozy na Herzog bakekwaho kuba barasezeranyije Azibert akazi i Monaco mu gihe yabaha amakuru ku iperereza yakorwagaho ku inkunga itemewe n’amategeko yatewe, ubwo yiyamamazaga mu 2007, n’umuherwekazi Liliane Bettencourt, uzaragwa L’Oreal.
Sarkozy yageze mu rukiko akikijwe n’umwunganira mu mategeko n’abashinzwe kumurinda, abanyamakuru nabo babukereye.
Urukiko rwa Paris rwongerewe umutekano kubera ko iburanisha muri uru rubanza riteganijwe kugeza ku ya 10 Ukuboza, rikazaba mu gihe kimwe n’urundi rubanza rukomeye, rw’ibitero byagabwe mu 2015 ku kinyamakuru Charlie Hebdo no ku isoko rya kosher (Kosher supermarket).
Urubanza rwatangiye kuri uyu wa Mbere Azibert atari mu rukiko, biba ngombwa ko umwunganira asaba ko urubanza rusubikwa. Yavuze ko umukiriya we arwaye kandi byamushyira mu kaga afashe urugendo akajya mu rukiko, bituma urubanza rusbikwa mu gihe hategerejwe raporo ya muganga.
Urubanza biteganyijwe ko ruzasubukurwa kuwa Kane.
Mu 2014, Sarkozy na Herzog bakoresheje terefone zigendanwa, zibaruye ku izina rya “Paul Bismuth”, kugira ngo bashobore kugirana ibiganiro byihariye kuko batinyaga ko ibiganiro byabo byumvirizwa.
Sarkozy na Herzog basobanuye ko baguze terefone kugira ngo birinde kumvirizwa mu buryo butemewe. Abacamanza bashinzwe iperereza ariko, bakeka ko bashakaga kwirinda kumvirizwa n’abashinzwe iperereza.
Abacamanza basanze ibiganiro hagati ya Sarkozy n’umwunganizi we byerekana ko bari bazi ko abashinzwe iperereza muri icyo gihe bumvirizaga ibiganiro bagiriraga kuri terefone zabo zizwi.
Izina rya Sarkozy rimaze imyaka myinshi rigaragara mu yandi maperereza y’ubucamanza.
Ibirego birimo guterwa inkunga mu buryo butemewe n’umunyagitugu Muammar Kadhafi ubwo yiyamamazaga mu 2007 byatumye inzozi yari afite zo kongera guhatana mu matora yo mu 2017 zizima.
Nyuma y’aho ishyaka rye ryanze kongera kumutora nk’umukandida waryo, yahise ava mu bya politiki.
