Kuva ku wa gatandatu ushize, impunzi z’Abarundi ziri mu nkambi ya Nyarugusu mu gihugu cya Tanzania zategetswe gusenya imirima yose y’ibihingwa zateye, usibye iy’imboga. Ni itegeko bivugwa ko ryatanzwe n’abayobozi ba zone zo mu nkambi, nabo bavuga ko ari amabwiriza yaturutse mu bategetsi b’iki gihugu. Iki cyemezo kandi giherutse gufatwa mu yindi nkambi icumbikiye impunzi z’ Abarundi, ibintu zifata nk’uburyo bwo kugerageza kuzihatira gutaha.
Iki cyemezo impunzi zakimenyeshejwe ku wa Gatandatu mu nama yabereye mu nkambi hagati y’abayobozi ba zone zo mu nkambi n’impunzi.
Impunzi zagize ziti: “Abayobozi ba zone baduteranyije igitaraganya. Barakaye cyane, batubwiye ko bamaze kwakira amabwiriza yo kurandura imyaka yose uretse imboga. Basobanuye ko iryo tegeko ryaturutse kuri perezida w’inkambi akaba ari na we uhagarariye guverinoma ya Tanzania.”
Zakomeje zigira ziti: “Badutegetse kwangiza imirima yacu ubwacu, bitabaye ibyo abapolisi bakaza bakayitaho. Banamenyesheje kandi ko abatabikora bahanishwa ibihano kugeza no gukurirwaho statut y’impunzi”.
Impunzi zavuganye na SOS Médias Burundi, dukesha iyi nkuru, zivuga ko ibihingwa nk’imbuto, ibigori n’ibishyimbo bikikije amazu yabo, byangijwe.
Baramagana iki cyemezo kibabuza kubona indyo yuzuye no kurwanya imirire mibi, cyane cyane mu bana.
Icyemezo nk’iki kikaba giherutse gufatwa mu nkambi ya Nduta, na yo icumbikiye impunzi z’Abarundi muri Tanzania.
