Perezida wa Kenya, Uhuru Kenyatta, yohereje muri Repubulika iharanira Demokarasi ya Congo intumwa igiye kugerageza kwegeranya Perezida Felix Tshisekedi n’uwo yasimbuye, Joseph Kabila, muri iki gihe batari guhuza ku miyoborere y’igihugu amahuriro yabo yombi ya politiki ahuriyeho.
Iyo ntumwa ya Perezida Kenyatta ni Stephen Kalonzo Musyoka uri I Kinshasa kuva kuri uyu wa Kabiri, itariki 24 Ugushyingo, aho bivugwa ko yavuganye mu bihe bitandukanye na Tshisekedi na Kabila nubwo ibyo baganiriye bitarajya ahagaragara.
Twababwira ko Kalonzo Musyoka yabaye umukandida mu matora y’umukuru w’igihugu muri Kenya mu 2007, ndetse akaba yarabaye minisitiri w’ububanyi n’amahanga wa Kenya inshuro ebyiri. Yari ashyiriye ubutumwa bw’ibanga Tshisekedi na Kabila buturutse kuri Perezida wa Kenya, Uhuru Kenyatta.
Iyi ntumwa ya perezida wa Kenya yerekeje muri Repubulika iharanira Demokarasi ya Congo, mu gihe havugwa umubano utari mwiza hagati ya Perezida Tshisekedi na Joseph Kabila, kuri ubu basa nk’abari kunanirwa gukomeza ihuriro ryabo riyoboye igihugu.
Amahuriro abiri y’imitwe ya politiki aba bagabo bayoboye, CACH (Cap pour le changement) rya Tshisekedi na FCC (Front Commun pour le Congo) rya Kabila amaze iminsi atavuga rumwe ku buryo ashobora no gusesa ihuriro ryayo.
Kalonzo yahuriye na Kabila ku ifamu ye mu nkengero za Kinshasa
Stephen Kalonzo Musyoka rero nk’uko bitangazwa na Mediacongo, yagiye i Kinshasa nk’ugiye kuzimya umuriro. Mu gihugu cya Kenya, niho havukiye mu 2018 ihuriro rya CACH, ryashinzwe hagati ya Tshisekedi n’uwahoze ari umuyobozi w’ibiro bye, Vital Kamerhe, kuri ubu uri muri gereza, nyuma y’ibiganiro byari bihagarikiwe na Perezida Kenyatta.
Perezida Uhuru Kenyatta kandi niwe mukuru w’igihugu rukumbi wo muri Afurika witabiriye umuhango w’irahira rya Perezida Felix Tshisekedi ku itariki 24 Mutarama 2019. Mu rwego rwo kumushimira, Tshisekedi nawe uruzinduko rwa mbere yakoreye hanze y’igihugu yarugiriye I Nairobi.
