Perezida wa Brazil, Jair Bolsonaro kuri uyu wa Kane, itariki 26 Ugushyingo, yatangaje ku mugaragaro ko atazigera yemera urukingo rwa Covid-19 kandi ari uburenganzira bwe.
“Ndababwira, ntarwo nzakira. Ni uburenganzira bwanjye,” ibi ni ibyatangajwe na Perezida Bolsonaro bihita bikwirakwizwa ku mbuga nkoranyambaga zitandukanye.
Igihugu cya Brazil, kimaze kubarurwamo abasaga miliyoni 6 banduye Covid-19, kiza inyuma ya Leta Zunze Ubumwe za Amerika n’u Buhinde gusa mu kwibasirwa n’iki cyorezo, aho kimaze gupfusha abantu 170,000.
Perezida Bolsonaro uvugwaho kuba yarirengagije ubukana bw’iki cyorezo, yanagaragaje gushidikanya ku kwambara udupfukamunwa. Byongeye kandi, kuri uyu wa Kane ntiyahishe ko inteko ishinga amategeko ishobora kutagira itegeko kuzakoresha urukingo rwa coronavirus.
Urubuga rwa Al Jazeera ruravuga ko Perezida Bolsonaro kenshi yagiye avuga ko Abanyabrazil batazasabwa gufata urukingo rwa coronavirus igihe ruzaba rumaze kuboneka ku Isi.
Mu Ukwakira, ho yigeze no gutebya ku rukuta rwe rwa Twitter avuga ko imbwa ye ari yo yonyine izakenera urukingo.
