Imwe mu makipe abiri y’umupira w’amaguru akomeye cyane muri Esipanye, FC Barcelona ikomeje gusuzugurwa mu buryo budasanzwe, mu gihe byari byitezwe ko izitwara neza nyuma yo gukora amavugurura mbere y’uko umwaka w’imikino utangira.
Ubu aho bigeze, iyi kipe yavaga mu myanya ine ya mbere ku rutonde rw’agateganyo bigoranye, iri ku mwanya wa 7 n’amanota 14 kuri 30, inyuma y’amakipe nka Atletico Madrid iri ku wa 1, Real Sociedad iri ku wa 2, Real Madrid iri ku wa 3 na Villarreal iri ku wa 4.
FC Barcelona yatangiye urugendo nabi ubwo tariki ya 4 Ukwakira 2020, ubwo yanganyaga igitego 1-1 na FC Sevilla yari isanzwe ikuraho insinzi kandi iyinyagira ibitego byinshi. Ku mukino wakurikiyeho wabaye tariki ya 17 Ukwakira 2020, FC Barcelona yongeye gutsindwa na Getafe igitego 1-0.
Urugendo rwakomeje kuba rubi kuri iyi kipe y’ubukombe, ubwo tariki ya 24 Ukwakira 2020 iri ku kibuga cyayo (Camp Nou) na none yatsindwaga na Real Madrid ibitego 3-1.
Hashize icyumweru kimwe, tariki ya 31 Ukwakira 2020, FC Barcelona yanganyije na Deportivo Alavez igitego 1-1, na none itsindwa na Atletico Madrid igitego 1-0 tariki ya 21 Ugushyingo 2020.
Kuri uyu wa 5 Ukuboza 2020, FC Barcelona yari ifite abakinnyi bose b’inkingi za mwamba nka Captain Lionel Messi, Antoine Griezmann, Philip Coutinho, Sergio Busquets, Jordi Alba n’umuzamu Ter Stegen yongeye gutsindwa na Cadiz ibitego 2-1.
Muri uyu mukino wahuje FC Barcelona na Cadiz, Messi yakinnye iminota yose ariko birananirana
FC Barcelona ntako itagize ikora amavugurura
Bitewe no kwitwara nabi muri shampiyona y’icyiciro cya mbere muri Esipanye (La Liga), UEFA Champions League no mu irushanwa ry’igihugu rya Copa del Rey, byatumye iyi kipe ikora impinduka zikomeye zatuma yongera kwisubiza igitinyiro.
Impinduka ya mbere ikomeye yabaye muri iyi kipe ni ihagarikwa ry’umutoza Quique Setié wasimbuje Umuholandi Ronald Koeman tariki ya 19 Kanama 2020.
Umutoza Ronald Koeman ntarafatisha ikipe
Hakurikiyeho kurekura abakinnyi bakomeye barimo Louis Suarez wagiye muri Atletico Madrid, Ivan Rakitic wagiye muri FC Sevilla, Arturo Vidal wagiye muri Juventus; Philip Coutinho wari waratijwe muri Bayern Munich aragaruka.
Mu buryo butunguranye, Perezida w’iyi kipe, Josep Maria Bartromeu bamwe mu basesenguzi babonaga nk’ikibazo nyamukuru gisigaye, yeguranye na komite ye yose mu Kwakira 2020, abakunzi ba FC Barcelona batekereza ko ryaba ribaye iherezo ry’ibibazo.
Muri izi mpinduka zose FC Barcelona yakoze, bigaragara ko n’ubundi nta cyizere cy’uko hari ibitangaza abakunzi bayo bayitegaho. Gusa igisubizo gishobora kuzava kuri Perezida mushya uzatorwa; witezweho kuzagura abakinnyi bakomeye no kugarura abarimo Neymar Jr ukinira Paris Saint Germain mu Bufaransa.
